Memleket basshysynyń tapsyrmasyna sáıkes mınıstrlik 2023 jylǵy aýyl sharýashylyǵy maýsymy aıasynda aýa raıynan zardap shekken fermerlerdiń qaryzdaryn uzartý boıynsha sharalar qabyldaýda, dep habarlaıdy Almaty-akshamy.kz.
Osylaısha, Aýylsharýashyǵy mınıstrligi agroónerkásiptik keshen sýbektilerine nesıe berý, sondaı-aq aýyl sharýashylyǵy janýarlaryn, tehnıka men tehnologıalyq jabdyqtardy satyp alý lızıńi kezinde syıaqy mólsherlemelerin sýbsıdıalaý qaǵıdalaryna ózgerister engizdi.
Qabyldanǵan jańalyqtar qaryz alýshy úshin nasharlatatyn jaǵdaılardyń týyndaýyna baılanysty syıaqy mólsherlemesin tóleý jáne (nemese) negizgi qaryzdy óteý merzimin 10 aıdan 24 aıǵa deıin uzartýǵa múmkindik beredi.
Buǵan deıin «Keń dala» kóktemgi egis jáne egin jınaý jumystaryn nesıelendirý boıynsha jeńildikti baǵdarlama men uzartý sharalary sheńberinde búdjettik nesıeni qaıta qurylymdaý júrgizildi. Bul baǵdarlama qatysýshylaryna qaryzdardy aıyppul sanksıalaryn qoldanbaı uzartýǵa múmkindik berdi.
Joǵaryda kórsetilgen búdjettik kredıtti qaıta qurylymdaýdan tys qaryzdardy uzartýdy júrgizý qajet bolǵan jaǵdaıda búdjet qarajatyn qarjy ınstıtýtynyń menshikti ne tartylǵan qarajatyna aýystyrý jolymen uzartýdy júrgizý kózdelgen. Bul rette osyndaı uzartylǵan qaryzdar boıynsha qarjylandyrý mólsherlemesi naryq jaǵdaıynda qalyptasady jáne 19-20% -dan asýy múmkin.
Osyǵan baılanysty, túpkilikti qaryz alýshy – fermer úshin syıaqy mólsherlemesin tómendetýdi qamtamasyz etý maqsatynda Qaǵıdalarda sýbsıdıalaý baǵdarlamasyna naryqtyq mólsherleme boıynsha uzartylǵan kredıttik kelisimderdiń qatysý múmkindigi qarastyrylǵan. Tıisinshe, aýyl sharýashylyǵy sýbektileri eńbekaqy mólsherlemesin 6 paıyzǵa deıin tómendetýge múmkindik alady, al aıyrmashylyqty memleket tóleıdi.
Aýyl sharýashylyǵy mınıstrliginiń tıisti buıryǵy 2023 jylǵy 29 jeltoqsanda memlekettik tirkeýden ótti jáne alǵashqy resmı jarıalanǵan kúninen keıin kúntizbelik on kún ótken soń qoldanysqa engiziledi.
Eske salaıyq, jalpy 2024 jyly atalǵan baǵdarlama boıynsha syıaqy mólsherlemelerin sýbsıdıalaý maqsatynda jergilikti atqarýshy organdardan 87,2 mlrd teńge búdjet qarajaty qarastyrylǵan.