Kolejderge tıimdi format
QR Oqý-aǵartý mınıstri Asqat Aımaǵambetov eldegi kolejderdiń basqarý formasyn «sharýashylyq is júrgizý quqyǵyna» aýystyrýdy usyndy, dep habarlaıdy Almaty-akshamy.kz QazAqparat-qa silteme jasap.
«Keıbireýler «sharýashylyq júrgizý quqyǵynan» (SHJQ) qorqady, biraq uıymdastyrý-quqyqtyq formasy tıimsiz bolǵandyqtan emes, jan basyna qarjylandyrýdan qorqady. Biz birneshe kolejge taldaý júrgizdik. Mysaly, shaǵyn kolejde 120 stýdent, jeti orynbasar bar, toptar az. Tipti memlekettik tapsyrys somasyn 800 myń teńgege deıin kótersek te, bul qarjy kolejge jetpeı jatady. Shtattardyń tıptik erejeleri bar ekeni túsinikti, biraq bul shtattyń barlyǵyn ustap turýǵa eshkim májbúrlemeıdi, kerisinshe, SHJQ formaty kolej dırektoryna qarjyny únemdeýge múmkindik beredi. Orynbasarlardy azaıtyp, sol aqshany basqa nárselerge baǵyttaı alasyz. Nemese orynbasardyń ornyna advokatty nemese memlekettik satyp alýshyny jumysqa alýǵa bolady. Iaǵnı, SHJQ-daǵy format kolejderge tıimdi», - dedi mınıstr elordada ótken tamyz konferensıasynyń «Eńbek naryǵy jáne kásiptik bilim: jańa múmkindikter» paneldik sesıasynda.
A. Aımaǵambetov kolejder smeta boıynsha emes, árbir stýdentti eskere otyryp qarjylandyrylatynyn eske saldy. Bul júıege úırenip, komfort aımaǵynan shyǵyp, stýdentterdi tartýdy úırený kerek.
«Bir stýdentke bólingen tutas qarajat osy kolejge túsedi. Únemdeýdi kórip, únemdelgen qarajatty alyp qoıý bolmaıdy. Bul jaǵdaıda kolejde únemdeýge, qosymsha shtattardy jabýǵa, basqa shtattardy engizýge jáne basqalaryna yntalandyrý bolmaıdy», - dep tolyqtyrdy mınıstr.