Oqý jyly bastalǵaly mektep kitaphanalary 2 mln kórkem ádebıetpen tolyqty
Halyqaralyq kitap jáne avtorlyq quqyq kúnimen quttyqtaǵan Bilim jáne ǵylym mınıstri ata-analardan balalaryn kitap oqýǵa baýlýdy surady. Mınıstr bul ótinishin áleýmettik jelidegi paraqshasynda jazdy, dep habarlaıdy Almaty-akshamy.kz.
«Shamamen bir aıdan keıin oqýshylarymyz kanıkýlǵa shyǵady. Barlyq ata-anadan balalaryn kitap oqýǵa baýlýdy suraımyn. Al balalarymyz kitap pen telefon arasyndaǵy tepe-teńdikti umytpaıdy dep úmittenemin. Kitaptyń elektrondy nusqasyn oqyǵan da jaqsy. Kitap qashan da balalardy tárbıeleýdiń, emosıonaldy aqyl-oıyn, synı oılaýyn, qıalyn damytý, sonymen qatar onyń sózdik qoryn tolyqtyrý, aqyldy jáne saýatty bolýynyń úzdik ádis bolyp qala beredi», - dep jazdy Asqat Aımaǵambetov.
Mınıstrdiń aıtýynsha, balalardy kitap oqýǵa baýlý úshin elimizdegi balabaqshalarda, mektepterde, kolejder men ýnıversıtetterde barlyq qajetti jaǵdaıdy jasaý mańyzdy. 2020 jyly «Oqýǵa qushtar mektep» jobasy iske qosylǵan.
«Oqý jyly bastalǵaly mektep kitaphanalary 2 mln kórkem ádebıetpen tolyqty. Odan bólek, kitaphanalarda kovorkıng ortalyqtar qurylyp jatyr. Búgingi tańda olardyń sany 500-ge jýyq. Mektep oqýshylarynyń kúndelikti 20 mınýttyq kitap oqý daǵdysy engiziledi», - deıdi vedomstvo basshysy.
Mınıstr qazaqstandyq ýnıversıtetter men kolejderdiń de kitaphanalaryn avtomattandyryp, qaıta jabdyqtaý jumystaryn júrgizip jatqanyna toqtalǵan.
«Árıne, kitapty sıfrlandyrýǵa jáne jaıly oqý zaldaryn ashýǵa qansha qarjy jumsalsa da, eń bastysy - balalardyń kitap oqýǵa degen súıispenshiligin oıatý. Ony jeke tájirıbemnen de bilemin. Balalarmen kitap kórmeleri men dúkenderge, ádebı keshterge baryp turý mańyzdy. Osyǵan deıin, bala kezimnen ǵylymı fantasıkany jaqsy kóretinimdi aıtqan edim. Aızek Azımov, Reı Bredberı, aǵaıyndy Strýgaskıılerdiń shyǵarmalaryna degen qyzyǵýshylyǵym keıin ǵylymı ádebıetke degen úlken qyzyǵýshylyqqa aınaldy», - dep mınıstr tájirıbesimen bólisipti.
Buǵan deıin habarlaǵanymyzdaı, Túrki akademıasyn qarjylandyrýǵa búdjetten 1 mln dollar bólingen.