Memleket basshysynyń jyl saıynǵy dástúrge aınalǵan Joldaýy el damýynyń basym baǵyttaryn aıqyndap, onyń keleshegine batyl qadamdar jasaıtyn basty qujat. Bıylǵy Joldaý da osy mindetter údesinen kórindi dep nyq senimmen aıtýǵa bolady.
Meni kópten beri tolǵandyryp, ózegimdi órtep júrgen ózekti máseleniń biri memlekettiń strategıalyq mánge ıe nysandarynyń jaı-kúıi, qorǵalýy edi. Bul rette sý máselesiniń sóz bolýy meniń kóńilime qondy. Ásirese, sýdy tıimdi, únemdi paıdalanýdy oılaı bermeıtinimiz janyma batady.
Sý, taza aýa bar tirshilik ataýlynyń kózi. Halqymyz "sýly jer - nýly jer" dep bekerge aıtpasa kerek. Sondyqtan ol memlekettiń qaraýynda, qatań baqylaýynda bolýy kerek. Ásirese transshekaralyq aımaqtarda daýly másele bolmaýy tıis. Tarıhta sýǵa qatysty talaı márte tartysty, shıelenisti jaǵdaılar oryn alǵanyn qaperden shyǵarmaýymyz kerek. Árıne bizde qudaıǵa shúkir mundaı másele bolǵan emes. Deıturǵanmen "saqtansań saqtaımyn" degen prınsıpti udaıy nazarda ustaǵan jón. Bul rette Qasym-Jomart Kemelulynyń arnaıy Sý mınıstrligin qurýǵa pármen berýi óte quptarlyq is.
Eger strategıalyq mańyzy turǵysynan alyp qaraıtyn bolsaq, tabıǵatty, qorshaǵan ortany qorǵaýdan artyq qasıetti mindet bola bermeıdi. Óıtkeni jutqan aýań, ishken sýyń adam densaýlyǵyn saqtaýdyń basty kepili. Osy rette keıingi jyldarda tabıǵaty kórkem Almaty sıaqty shaharlardyń ekologıasy da syn kótermeıtini jasyryn emes. . Tipti qala ishinde ekologıanyń qarapaıym talaptaryn da eskere bermeıtin kólikterdi baqylaıtyn ekopostylar jumysyn báseńdetip alǵan.Sonymen qatar taýdan keletin salqyn samaldy tejeıtin bıik ǵımarattar salýdy da belgili mólsherde, ár jerdiń tabıǵı múmkindigin qatań eskere otyryp shektegen jón. Sondyqtan Ekologıa mınıstrligin de qaıta quryp, mártebesin de zańmen bekitý kezek kúttirmeıtin másele dep bilemin.
Sonymen qatar aýyl, aýdan ákimdikteriniń joǵaryǵa qol jaıyp otyrmaı, búdjeti derbes bolyp, qarajatqa ózi qojalyq etýi de durys oılastyrylǵan.
Ásirese Joldaýda balalardyń oqýyna, ata-anaǵa úlken kómek bolatyn "Keleshek" nesıesiniń qolǵa alynatyny qýantty. Jalpy halyqtyń áleýmettik, turmystyq jaǵdaıyn arttyrýdy memlekettiń moınyna júktep qoımaı, tabysy taıqazandaı tasyǵan, tıisti qorlar, kompanıalar arqyly da jaqsartýdyń jolyn izdeý kerek. Sondyqtan qosymsha qarjy kózderin taýyp, eń tómengi jalaqy mólsherin 85 myń teńgeden joǵary kóterýge de múmkindigimiz zor. Bul rette Memleket basshysynyń shetke ketken aktıvterdiń eselep qaıtarylyp jatqanyn atap ótýi de kóp jaıdan úmittendiredi.
Qoryta aıtqanda, istiń kózin taba bilý, uıymdastyrý jumystaryn durys, úılesimdi júrgizý - Joldaýda aıtylǵan talaptardy júzege asyrýdyń basty kepili.