Búgin Astananyń qylmystyq ister jónindegi mamandandyrylǵan aýdanaralyq sotynyń apelásıalyq alqasy burynǵy mádenıet jáne sport mınıstri Arystanbek Muhamedıulyna, onyń áıeli men advokatyna qatysty is pen úkimdi qarady, dep habarlaıdy almaty-akshamy.kz.
Aıta keteıik, aqpan aıynda Astana qylmystyq ister jónindegi mamandandyrylǵan aýdanaralyq soty Qazaqstan Ulttyq mýzeıiniń burynǵy dırektory, burynǵy mádenıet jáne sport eks-mınıstri Arystanbek Muhamedıulyna jáne basqa da adamdarǵa qatysty úkim shyǵarǵan edi.
Arystanbek Muhamedıuly asa iri kólemde para alýǵa árekettengeni úshin kináli dep tanyldy. Ótken jazany eskere otyryp, burynǵy sheneýnik ómir boıyna memlekettik qyzmette qyzmet atqarýǵa tyıym salynyp, 11 jylǵa bas bostandyǵynan aıyryldy.
Búgingi sotta sottalǵandardyń advokattary men qoǵamdyq qorǵaýshylary sóz sóıledi.
Arystanbek Muhamedıulynyń qoǵamdyq qorǵaýshysy onyń uly Dımash Muhamedı boldy.
Dımash óziniń sotqa daıyndalyp úlgermegenin aıtyp, óz sózin Memleket basshysy Qasym-Jomart Toqaevqa alǵys bildirýden bastady. Prezıdentke Jańa Qazaqstandy engizgeni úshin jáne Sot júıesiniń obektıvti, ashyq jáne ádil bolýyna erekshe nazar aýdarǵany úshin rızashylyǵyn bildirdi.
Arystanbektiń uly ata-anasynyń bala kezinen adaldyqqa, ádeptilikke úıretkenin de atap ótti.
Advokatty qoldaǵym keledi. Ákem Arystanbek Muhamedıulyn tolyǵymen aqtaýdy suraımyn. Sebebi bul oıdan shyǵarylǵan is. Meniń anam Ǵalıa Ysqaqovany tolyǵymen aqtasańyzdar. Eki jyldan astam ýaqyt boıy otbasymyzda qýanyshtyń lebi sezilmeı qaldy, - dedi ol.
Dımash Muhamedıdiń aıtýynsha, ákesi eki jyldan astam ýaqyt qamaýda bolǵandyqtan, ol áli óziniń birinshi nemeresin de kórmegen. Sondaı-aq anasy zańsyz alty aı boıy úı qamaýynda otyr.
Sotta Mustahım Tóleevtiń advokaty Karına Jumaǵazıeva da sóz sóıledi.
Tóleev basqa sottalǵandarmen zań kómegin kórsetý týraly shart jasasty. Ol óz isin sońyna deıin aıaqtamady jáne zań talaptaryna sáıkes alǵan syıaqysyn qaıtarýǵa mindetti. Tóleev ony qaıtardy, múliktik nemese basqa sıpattaǵy shaǵymdar joq ekeni týraly qolhatta jazylǵan. Advokat pen klıent arasyndaǵy qarapaıym azamattyq qatynastar qylmystyq quqyq buzýshylyq sıaqty kórinedi, - dedi Karına Jumaǵazıeva.
Mustahım Tóleevti onyń uly Temirlan Tóleev, Arystanbek Muhamedıulynyń múddesin advokat Rahym Maqajanov, taǵy da birqatar advokattar men qoǵamdyq qorǵaýshylar qorǵady.
Prokýror Arman Kazıken apelásıalyq shaǵymdarda keltirilgen dálelder úkimniń kúshin joıýǵa negiz bola almaıdy dep sanaıdy. Sot keńesý bólmesine ketti. Sheshim búgin tústen keıin jarıalanady dep kútilýde.