Integrasıalaý jumystary júrgizilip jatyr
Balalar jattyǵatyn oryndarǵa qoıylatyn talaptardy kúsheıtip jatyrmyz. Bul týraly búgin Mádenıet jáne sport mınıstri Dáýren Abaev Almaty oblysy turǵyndarynyń suraqtaryna jaýap berý barysynda aıtty, dep habarlaıdy Almaty-akshamy.kz QazAqparatqa silteme jasap.
Qazaqstandyq balalar Artsport baǵdarlamasy aıasynda sportpen jáne shyǵarmashylyqpen tegin aınalysyp jatyr. Aldaǵy ýaqytta kórsetilip jatqan qyzmetterdiń sapasyn arttyryp, balalarǵa qolaıly jaǵdaı jasaý maqsatynda kásipkerlerge qoıylatyn talaptarǵa ózgerister engiziledi.
Qazirgi ýaqytta baǵdarlama platformasyn Ulttyq bilim berý derekter bazasymen (UBDB) ıntegrasıalaý jumystary júrgizilip jatyr.
«Keıbir balalar úıirmeler men sporttyq seksıalarǵa barmasa da, qyzmet kórsetýshilerdiń qujattarynda tirkelip turady, olar óz kezeginde ár bala úshin memleketten aqsha alyp otyr. Ári sapa máselesi de nazardan tys qalmaýy kerek. Balalar jattyǵatyn oryndarǵa qoıylatyn talaptardy kúsheıtip jatyrmyz. Ol – ǵımarattyń sanıtarlyq jaǵdaıy, órt qaýipsizdigi, beınebaqylaý kameralary, sporttyq jáne basqa da qajetti jabdyqtardyń bolýy. Munyń barlyǵy balalardyń sapaly bilim alýy úshin, qaýipsizdigi úshin jasalady. Sport túrine baılanysty jattyǵýdy qaı jastan bastap jasaýǵa bolatyny da naqtylanady», - dedi Dáýren Abaev.
Aıta ketý kerek, baǵdarlama boıynsha qyzmet kórsetip jatqan kásipkerler men ata-analar mınıstrge talaptardy kúsheıtýge qatysty birlesip jumys isteýge múmkindik jasaǵany úshin alǵys bildirip, balalardyń qolymen jasalǵan buıymdardy syılyq retinde tabys etti.
Sondaı-aq Qonaev qalasynda ótken halyqpen kezdesý barysynda eńbekaqyny kóterý, týrızm salasynda kadrlar daıarlaý, sporttyq razrádtar berý jáne t. b. máseleler talqylandy.