Úzdikter respýblıkalyq baıqaýǵa joldama alady
Almaty oblysynda jas qarılar saıysy ótti, dep habarlaıdy Almaty-akshamy.kz Almaty.tv-ge silteme jasap.
16 jastaǵy Muhammed Baltabaı jas qarılar saıysyna alǵash ret qatysyp otyr. Kishkentaıynyn Quran oqyp, ıslam ilimine qyzyǵýshylyq tanytyp ósken. Oǵan ata-anasy men meshittegi ustazdardy sebep bolypty. Qasıetti kitapqa qurmet kórsetý basty paryz sanaıtyn Muhammedtiń aıtýynsha, bul – ata-babamyzdan kele jatqan ıgi dástúr.
«Quranǵa qyzyǵýshylyǵym 10 jasymnan bastaldy. 3 jyldaı osy jerde oqydym. Sosyn Týrsıaǵa oqydym. Qurandy jattaǵan adamnyń eki ómirde de dárejesi joǵary bolady», – dedi jarysqa qatysýshy Muhammed Baltabaı
Búgingi jas qarılar saıysyna oblystyń ár aımaǵynan 12-30 jas aralyǵyndaǵy 65 úmitker kelip, baq synady. QMDB tikeleı uıymdastyrýmen ótken is-shara bıyl 11-ret ótkizilip otyr. Maqsat – jastar arasynda dinı saýat ashý, olardyń Quran Kárimge yqylasyn arttyrý.
«Osyndaı jarysqa kóbirek qatyssa, Qurandy, Allany tanýǵa degen yqylastary joǵary dárejede bolady. Dindi jaqsy kóretin bolady. Dindi jaqsy kórse, ımandy urpaqtarymyz kóp bolsa, elimizde qaı sala bolmasyn muǵalim bolsyn, dáriger bolsyn ol adal qyzmet etetin bolady», – dedi QMDB-nyń naıb mýftıi Kenjeáli Qajy Qońyratbaıuly.
Baıqaý qatysýshylarynyń talabyn elimizge tanymal qarılar baıqap kórdi. Ádil-qazylar Quran Kárimniń kez-kelgen jerinen úzindi oqıdy. Al qatysýshy bolsa, qatelespeı ary qaraı jalǵastyryp áketýi kerek. Oblystyq bas ımamnyń aıtýynsha, úmitkerlerdiń sany jyl sanap artyp keledi.
«Paıǵambarymyz (s.ǵ.s) hadısinde «Senderdiń eń jaqsylaryń Qurandy úırenip, ony ózgelerge úıretkenderiń» deıdi. Mine sondyqtan Qasıetti Quranymyzdy shákirtterimiz jattap, osyndaı deńgeıge jetip, meshitterimizde, oblys ortalyqtarynda jarystar ótip turady», – dedi Almaty oblysynyń bas ımamy Madıar Pirimqulov.
Quran Kárimdi mánerlep jáne jatqa oqý saıysy qazir elimizdiń ár óńirinde ótip jatyr. Túrli aımaqtan úzdik shyqqandar respýblıkalyq baıqaýǵa joldama alady. Ol qyrkúıek aıynda ótedi dep josparlanyp otyr. Al respýblıkalyq baıqaýdyń júldegeri halyqaralyq Quran jarysyna qatysyp, elimizdiń namysyn álemdik deńgeıde qorǵaıtyn bolady.