Bul týraly Álıhan Smaıylov aıtty.
Úkimet basshysynyń aıtýynsha, ken óndiretin kompanıalarǵa talap kúsheıedi, dep habarlaıdy Almaty-akshamy.kz
«ArselorMıttal Temirtaý» AQ-ǵa tıesili Qaraǵandy oblysyndaǵy shahtalardaǵy apatqa toqtalaıyn. Jaqynda kómir óndirý boıynsha jer qoınaýyn paıdalaný kelisimshartyn qaıta qaraý barysynda osy kompanıaǵa alǵash ret qosymsha talaptardy engizdik: jyl saıyn kómir óndirisin jańǵyrtýǵa keminde 150 mlrd teńge bólý, kómir qabattaryn gazsyzdandyrýǵa 37 mlrd teńge ınvestısıa bólý. Buryn jer qoınaýyn paıdalanýshylarda mundaı mindetter bolmaǵan. Basqa jer qoınaýyn paıdalanýshylarǵa da osyndaı qosymsha talaptar men mindettemelerdi kúsheıtýdi josparlap otyrmyz», – dedi premer-mınıstr Senattyń jalpy otyrysynda.
Eske sala ketsek, 3 qarashada Qaraǵandy oblysynyń Shahtınsk qalasyndaǵy Lenın shahtasynda apat bolyp, 5 kenshi kóz jumǵan edi.
Al, ekologıalyq retteý jáne baqylaý komıteti «ArselorMıttal Temirtaý» AQ mılıardtaǵan aıyppul salynatynyn jarıalaǵan bolatyn. Sońǵy 3 jylda atalǵan kompanıaǵa ekologıalyq talaptardy saqtamaǵany úshin 3 mlrd teńgeden astam aıyppul salynǵan. Vedomstvo basshysy Serikqalı Brekeshev kompanıaǵa kelesi jylǵa ekologıalyq ruqsat berilmeýi múmkin ekenin joqqa shyǵarmady.