Bıdjý Naır men Djelson Batıstanyń ornyna jańa basshylar keldi
«ArselorMıttal Temirtaý» AQ baspasóz qyzmeti kompanıa basshylyǵynda ýaqytsha ózgerister oryn alǵany týraly habarlady. Bul aýys-túıiske Lenın atyndaǵy shahtadaǵy 3 qarashada bolǵan apatty tekserý jónindegi memlekettik komısıanyń baıandamasy túrtki bolǵan, dep habarlaıdy Almaty-akshamy.kz QazAqparatqa silteme jasap.
Eske sala keteıik, júrgizilgen tekseristen soń Úkimettik komısıa apattyń oryn alýyna shahtanyń 26 qyzmetkeri jaýapty dep qorytyndy shyǵarǵan bolatyn. Olardyń qatarynda kompanıa basshylyǵy qataryndaǵy eki shet eldik azamat bar ekeni málimdelgen bolatyn.
Alaıda ol azamattardy ónerkásip alybynyń jetekshileri basqa qyzmetke aýystyrǵan.
«Bıdjý Naır men Djelson Batısta ArselorMıttal vıse-prezıdenti jáne ArselorMıttal TMD bas dırektory Vıdjaı Goıaldyń keńesshileri bolyp taǵaıyndaldy, bul dereý kúshine enedi. Bul olarǵa aǵymdaǵy jaǵdaıǵa jáne 3 qarashada Lenın atyndaǵy shahtada bolǵan apattyń sebepterin tergeýge tolyq nazar aýdarýǵa múmkindik beredi», - delingen kompanıa habarlamasynda.
Bıdjý Naır men Djelson Batıstanyń ornyna jańa basshylar keldi.
Osylaısha, Vladımır Iablonskıı myrza «ArselorMıttal Temirtaý» AQ bas dırektorynyń mindetin atqarýshy bolyp, Vıktor Gafıýlov myrza «ArselorMıttal Temirtaý» AQ taý-ken isi departamenti bas dırektorynyń mindetin atqarýshy bolyp taǵaıyndaldy.
Kompanıa baspasóz qyzmetiniń málimdeýinshe, jańa basshylardyń osy saladaǵy bilimi men tájirıbesi zor.
Vıktor Vıktorovıch Gafıýlovtyń taý-ken ónerkásibinde 20 jyldan astam tájirıbesi bar. Eńbek jolyn 2000 jyly Balaklava taý-ken basqarmasynda bastap, marksheıderden óndiristik dırektorǵa deıin mansap satysynan ótken. Tájirıbeli, joǵary bilikti maman retinde Gafıýlov «ArselorMıttal Temirtaý» kompanıasyna jumysqa shaqyrylǵan. 2014 jyldan bastap ol «Kentóbe» qımasynda, «ArselorMıttal Temirtaý» AQ kenishiniń «Atansor» «Órken» JSHS dırektory bolyp jumys istedi. 2017 jyldan beri «Órken» taý-ken kásipornynyń basshysy. Bilimi boıynsha taý-ken ınjeneri.
Vladımır Ivanovıch Iablonskıı bas dırektordyń mindetin atqarýshy retinde óziniń metalýrgıa salasyndaǵy 33 jyldyq tájirıbesine súıenedi. Vladımır Iablonskıı Qaraǵandy metalýrgıalyq ınstıtýtyn bitirgennen keıin 1989 jyly Qaraǵandy metalýrgıalyq zaýytynda (qazirgi «ArselorMıttal Temirtaý») kásibı qyzmetin bastady. Shómishshi qyzmetinen «ArselorMıttal Temirtaý» kompanıasynyń óndiristik dırektoryna deıin kóterilgen. Osy jyldar aralyǵynda konverter sehyn basqardy, bolat óndirisiniń dırektory, birinshi qaıta bólýdiń dırektory boldy. Bul qyzmetke taǵaıyndalǵanǵa deıin ol «ArselorMıttal Temirtaý» AQ bolat departamentiniń óndiristik dırektory bolyp jumys istedi jáne 2022 jyldyń mamyrynda «ArselorMıttal» kompanıalar tobynyń bas menedjeri deńgeıine kóterildi.