Qaraǵandy oblysynyń ákimi jýrnalıserge "ArselorMıttal Temirtaý" shahtasyndaǵy jaǵdaı týraly aıtty
Qaraǵandy oblysynyń ákimi Ermaǵanbet Bólekpaev jýrnalısermen kezdesip, "ArselorMıttal Temirtaý" kompanıasynyń shahtalaryndaǵy jaǵdaı jáne qaza tapqan kenshilerdiń otbasylaryna kórsetilgen materıaldyq kómek týraly aıtyp berdi, dep habarlaıdy almaty-akshamy.kz
Aımaq basshysynyń aıtýynsha, búgingi tańda kompanıanyń tórt shahtasy tolyq jumys isteýde. "Qazaqstanda" órt saldaryn joıý jalǵasýda, Kostenko atyndaǵy shahtada apatty tergeý júrip jatyr.
– Mamandardyń baǵalaýy boıynsha Kostenkodaǵy jumysty tolyq qalpyna keltirý úshin taǵy 2–2,5 aı qajet bolady. Shahtalardy jabý týraly áńgime bolǵan joq. Olar jumys isteıdi, – dep sendirdi Ermaǵanbet Bólekpaev. – Sondaı-aq kenshiler men metalýrgterdiń jalaqysyn tómendetýge qatysty ózgerister bolmaıdy jáne qysqartýlar da bolmaıdy. Ujymdyq shartqa sáıkes barlyq mindettemeler oryndalatyn bolady.
Qaza tapqan kenshilerdiń otbasylary barlyq qajetti kómekti alady, dep tolyqtyrdy ákim. Búgingi tańda 46 otbasy BJZQ-dan jerleýge birjolǵy tólem qujattaryn resimdedi, 42-si tólendi, qalǵandaryna tólemder jalǵasýda. Respýblıkalyq búdjetten 23 jasqa deıingi JOO-da oqıtyn kámeletke tolmaǵan balalary bar 20 otbasyna asyraýshysynan aırylý jaǵdaıy boıynsha memlekettik áleýmettik járdemaqy taǵaıyndaldy
– "ArselorMıttal Temirtaý" kompanıasy tarapynan 41 otbasyna 10 jyldyq jalaqy tólendi. Qaza tapqan kenshilerdiń, olardyń jubaılarynyń, ata-analarynyń, balalarynyń nesıeleri óteldi, – dep atap ótti óńir basshysy. – Sondaı-aq, kompanıa árbir otbasy múshesine keminde 18 sharshy metr paıdaly alań esebi boıynsha páter satyp alýǵa mindettenedi. Saqtandyrý tólemderi, joǵary oqý oryndaryndaǵy balalardyń 23 jasqa deıin oqý aqysyn óteý qarasha aıynan bastap túse bastaıdy.
Oblys ákimi "ArselorMıttal Temirtaý" qaza tapqandardyń otbasylary aldyndaǵy barlyq mindettemelerdi oryndaıtynyn atap ótti.
Medısınalyq mekemelerde áli de zardap shekken 10 kenshi jatyr. Olar dárigerlerdiń baqylaýynda, jaǵdaılary ortasha jáne jeńil deńgeıde dep baǵalanady.
Sondaı-aq, jylytý maýsymynyń Temirtaýda ótýi erekshe baqylaýda. Oblysta ýaqtyly áreket etý úshin barlyq jylý kózderiniń jumysyn baqylaıtyn jedel shtab quryldy.
– "ArselorMıttal Temirtaý" JEO-2 bizdiń talabymyz boıynsha daıyndyq pasportyn alǵan joq. Olar 4-shi jáne 5-shi qazandyqtardy jóndeýdi uzaqqa sozyp aldy. Biz apta saıyn sol jerge baramyz jáne energıany baqylaý organdarymen birge jaǵdaıdy baqylap otyrmyz. Búgingi tańda stansıa shtattyq rejımde jumys isteıdi, – dedi aımaq basshysy. – Kómir qory jetkilikti – 20 kúnnen astam ýaqytqa eseptelgen. Jeltoqsan aıynda osy eki qazandyqtyń jóndeý jumystary aıaqtalýy tıis.
Sonymen qatar, Ermaǵanbet Bólekpaev óńirdiń áleýmettik-ekonomıkalyq damý josparlaryna toqtaldy. Oblys ákimine óńirdiń túrli salalaryna qatysty 40-qa jýyq suraq kelip tústi.