Pesh kúmbezi qulady
Qaraǵandy oblysynyń ákimdigi óndiris oryndaǵy qaıǵyly jaǵdaıǵa qatysty túsinik berdi, dep habarlaıdy Almaty-akshamy.kz.
Ákimdik taratqan málimette 2022 jylǵy 10 maýsymda «Qurylysmet» JSHS aýmaǵynda "ArselorMıttal Temirtaý" AQ qyzmetkerlerimen jazataıym oqıǵa oryn alǵany aıtylady.
«Otqa tózimdi kirpish qalaýyn bólshekteý kezinde usta-press sehynyń № 9 jumys istemeıtin termıalyq peshinde tóbe qulady. Pesh kúmbeziniń qulaýy nátıjesinde (kólemi 5h5h10 M) úıindilerdiń astynda bes adam qaldy. Olardyń tórteýi qaıtys boldy, bireýi 1994 jyly týǵan er adam aýrýhanaǵa jetkizildi»,-delingen habarlamada.
Qazirgi ýaqytta Qaraǵandy oblysy TJD qutqarýshylary (27 adam jáne 7 birlik tehnıka) jáne "Seriktes Órt Sóndirýshi" JSHS qyzmetkerleri (10 adam jáne 2 birlik tehnıka) úıindilerdi arshýda.
Oqıǵa ornynda Qaraǵandy oblysynyń ákimi Jeńis Qasymbek, TJD jáne ónerkásiptik qaýipsizdik basshylary bar.
QR Eńbek kodeksiniń talaptaryna sáıkes eńbek jónindegi ýákiletti organnyń ókimimen komısıa qurylady jáne jazataıym oqıǵaǵa arnaıy tekserý júrgiziledi. Nátıjeler týraly qosymsha habarlanatyn bolady.