Arnaıy ekonomıkalyq aımaqtar qyzmetin toqtatýy múmkin
QR Premer-Mınıstriniń birinshi orynbasary Álıhan Smaıylovtyń tóraǵalyǵymen arnaıy ekonomıkalyq aımaqtar (AEA) qyzmetiniń tıimdiligin arttyrý boıynsha jumys tobynyń otyrysy ótti, dep habarlady Almaty-akshamy.kz. QR Úkimeti saıtyndaǵy habarǵa silteme jasap.
Esterińizge sala keteıik, 2021 jylǵy 26 qańtarda Úkimettiń keńeıtilgen otyrysynda Memleket basshysy búdjet qarajatyn tıimsiz AEA-ǵa jumsaýǵa bolmaıdy jáne olardy joıý kerek dep atap ótti. Úkimette arnaıy jumys toby quryldy, onyń quramyna Esep komıtetiniń, Strategıalyq josparlaý jáne reformalar agenttiginiń, «Astana» halyqaralyq qarjy ortalyǵy men basqa da múddeli memlekettik organdar men uıymdardyń ókilderi kirdi.
Jumys tobynyń otyrysynda AEA tıimdiligin arttyrý tásilderine qatysty suraqtar kóterildi, onyń ishinde: AEA áreket etý merzimin belgileı otyryp, jeńildikter men preferensıalar berý úshin naqty jáne aıqyn krıterıılerdi anyqtaý (joǵary tehnologıalar, ımportty almastyrý, joǵary qosylǵan qun, ınovasıa, eksportqa baǵdarlaý jáne t. b.); qoldanystaǵy zańnamany jetildirý arqyly óz mindettemelerin oryndamaǵany úshin ınvestorlardyń jaýapkershiligin belgileý; jeke AEA-nyń, sonyń ishinde «Qorǵas» SHYHO, «Hımpark Taraz», «Astana - jańa qala», odan ári jumys jasaýynyń maqsattylyǵy qaraldy. Qorytyndysy boıynsha AEA-da jobalardy iske asyrý boıynsha jumysty kúsheıtýge, basqarýshy kompanıalardyń qyzmetin jaqsartýǵa, sondaı-aq otandyq óndirýshilerdi damytý úshin teń básekelestikti qamtamasyz etýge baǵyttalǵan jedel jáne júıelik sıpattaǵy sharalar usynyldy. Á. Smaıylov bir aptanyń ishinde AEA qyzmetin jaqsartý boıynsha usynylǵan tásilderdi pysyqtap, tıisti jobany talqyǵa salý úshin usynýdy tapsyrdy.
Búgingi tańda Qazaqstan Respýblıkasynda 13 AEA jumys isteıdi. Jumys istep turǵan AEA-da 303 joba iske asyryldy. 20 myńnan astam jumys orny ashyldy. AEA aýmaǵynda ónimniń 136 túri shyǵarylady, onyń ishinde 30-dan astam jańa ónim túrleri ındýstrıalandyrý baǵdarlamasyn iske asyrýdyń arqasynda paıda boldy (tikushaqtar, vıntovkaǵa arnalǵan optıkalyq kózdeýishter, túngi kórý qurylǵylary, bronetransporterler, lokomotıvter, elektr lokomotıvter, jolaýshylar vagondary, premıým-qubyrlar, maqta selúlozasy, polıpropılen jipteri jáne basqalary), sonymen qatar 50-den astam biregeı AT sheshimderi men qyzmetteri kórsetiledi.