27 jasqa tolǵan áskerı boryshyn ótemegen adamǵa áskerı bılet berilmeıdi. Bul týraly Qorǵanys mınıstriniń orynbasary, general-leıtenant Sultan Kamaletdınov aıtty, dep habarlaıdy almaty-akshamy.kz.
«Armıaǵa sıfrlyq tehnologıany engizý jalǵasyp jatyr. Áskerı mindettini, áskerge shaqyrylýshyny esepke alý sıfrlyq formatqa aýystyryldy. Bul jergilikti áskerı basqarý organynyń jumysyn avtomattandyrýǵa múmkindik berdi. Bıyl biz áýe qorǵanysy kúshteri úshin aqparattyq júıeni qabyldadyq. Bul elimizdiń áýe keńistigin paıdalanýda aqparat aǵymyn avtomatty rejımde óńdeýdi arttyrdy. Áýe shebin qorǵaýda sheshim qabyldaý ýaqytyn birneshe ese qysqartýǵa múmkindik berdi», - dedi Qorǵanys mınıstriniń orynbasary ortalyq komýnıkasıalar qyzmetindegi brıfıńte.
Onyń atap ótýinshe, halyqpen ózara is-qımyl máselesine basa nazar aýdarylyp otyr.
«Qyzmet ótkermegen, onyń ishinde 27 jasqa tolǵan adamǵa endi áskerı bılet berilmeıdi. Onyń ornyna áskerı mindettilik mártebesi onyń Egov jeke kabınetinde kórsetiledi. Jumysqa ornalasý kezinde áskerı qyzmetke qatysy týraly anyqtama alý qajet emes. Jumys berýshi bul aqparatty Egov-tan kóre alady. Sıfrlyq transformasıa aıasynda birqatar qyzmetti avtomatty túrde júzege asyrý múmkin boldy. Sonymen qatar, 17 jastaǵy azamatqa jeke isti jınaqtaý prosesi tolyǵymen avtomattandyryldy. Sıfrlandyrý boıynsha barlyq bastama júıeli túrde iske asady», - dedi Sultan Kamaletdınov.