«Jaıdarman jaqqan jańa juldyzdar»
Ázil, qaǵytpa qaljyń men kúldirý jarysy. Jaıdarman súıer qaýym úshin balalarǵa arnalǵan bıylǵy maýsymashar merekesi de máresine jetti, dep habarlaıdy Almaty-akshamy.kz.
El arasynda «KVN» atalyp ketken bul saıys biraz jyldan beri «Jaıdarman» degen atpen jaqsy tanys. Bıyl da jyldaǵy ádetten jańylmaı jaıdarmanshylar elordadaǵy «Jastar saraıyna» jınaldy. Qańtardyń 29-y kúni elimizdiń ár óńirinen jınalǵan komandalar tirkeýden ótip, sol kúni daıyndap kelgen baǵdarlamalaryn kórsetip úlgerdi. Bastapqyda festıválge júzden astam komanda tirkelip úlgergen. Degenmen, Bala Jaidarman-2024 uıymdastyrýshylarynyń málimetinshe, maýsymashar festıvaline respýblıka boıynsha 83 komanda jınalǵan, olardyń 65-i jasóspirimder komandasy bolsa, 18-i balalar quramalary.
Saıystyń ekinshi kezeńiniń talaby boıynsha, Jaidarman redaktorlary jan-jaqtan jınalǵan kil myqty quramalar arasynan 20-syn tańdap aldy. Maýsymashardyń gala-konsertine qalǵan jıyrmalyqtan úzdik degen 14 komanda tańdalyp, televızıalyq efırge ótip, dúıim jurttyń aldynda taǵy da óner kórsetip shyqty.
«Jaıdarman» jarysynyń bıylǵy erekesheligi - ol balalar úshin ótkizildi. Eldiń ár óńirinen úmitterin arqalap kelgen balalar men jasóspirimder arasynan úzdikterin tańdaý redaktorlar úshin ońaıǵa soqpady.
Jaıdarmanshylar jarysynda jerlester qatarynda Almaty qalasy men Almaty oblysynan barǵan birneshe komanda boı kórsetti. Degenmen, efırge ótken quramalardyń biri Almaty irgesinde ornalasqan Talǵar aýdanyna qarasty Tuzdybastaý aýylynan shyqqan «Kúlkibastaý» quramasy boldy. №13 jalpy bilim beretin mekteptiń 3 «J»-synyp oqýshylarynan quralǵan 5 bala ázil jarysyna qatysqan eń kishi komandalardyń biri boldy. Bul – jańadan qurylǵan «kúlkibastaýlyq» balalardyń respýblıka deńgeıindegi «Jaıdarmanǵa» alǵash ret barýy eken.
Oqýshylaryn ázil jarysyna tirkep, jol kórsetip, jón siltegen, úlken sahnaǵa shyǵýlaryna jol kórsetken ózderiniń ustazdary, synyp jetekshileri - Ahmetbekova Maqpal Mustafaqyzy. Muǵalimniń sózinshe bala tárbıesinde olardyń jan-jaqtylyǵyn ashýda «Jaıdarman» syndy saıystardyń bereri mol.
«Oqýshylarymnyń qalyń kórermeni bar sahna aldyna shyǵyp, óner kórsetýiniń ózi bir úlken jetistik. Bir barǵannan jarqyrap kóringenderi úshin óte qýanyshtymyn. Maqsatymyz balalardy juldyz etip, sahnaǵa daıyndaý emes. Bilim árqashan birinshi orynda. Bastysy - balany jan-jaqty etip ósirip, tárbıeleý, olardy asha bilý. Kez kelgen balanyń tek óner salasynda emes, bilim jolynda da jetistikke jetýi úshin «mektep-muǵalim- ata-ana» úshtiginiń oılary bir jerden shyqsa, alar asýlary bıik bolatyny sózsiz...», - deıdi Maqpal Mustafaqyzy.
Bul rette M.Ahmetbekova balalardyń jan-jaqty damýyna mektep basshylyǵy tarapynan da árqashan qoldaý baryna dán rıza.
Búginde «Jaıdarman» kórermenderi men oǵan qatysýshylar sany jyl saıyn artyp keledi. Degenmen, «bul jasta balalardyń sahnaǵa umtylmaı, sabaq oqyǵandary durys» nemese «Jaıdarmarmanǵa qatysamyn dep sabaqtary nasharlap» kete me dep alańdaıtyn ata-analar men osyǵan uqsas synı pikir aıtatyndar da tabylady. Osy salada júrgen jas jaıdarmanshylardy ázirlep, olardyń jasyna saı keletin, ári qoǵamdaǵy ózekti jaıttardy qatysýshylardyń ázilmen jetkizýine olardy baǵyttap otyratyn taǵy bir top bar. Ol – komandalardyń ázilin, oıynyn jazyp, sahnaǵa daıyndaıtyn jetekshileri.
«Kúlkisbastaý» quramasyn bastap barǵan Tuzdybastaý aýyly №13 JBB mekteptiń muǵalimi Qanaǵat Júnisbekov «Jaıdarman» arqyly kóp jetistikterge jetip, kóptegen «múmkindikter esigin» ashýǵa bolady deıdi.
«Jaıdarman – jas juldyzdardy jaǵatyn, ashatyn armandar oryndalatyn meken. Kóp ata-ana balalaryn Jaıdarmannan keıin sabaqtary nasharlaıdy, «juldyz» bop ketedi dep oılaıdy. Men bul oımen kelispeımin. Sebebi Jaıdarman syndy ázil jarystarynyń balalardyń kreatıvti oılaýyna, ónerli bolýyna, kópshilik aldynda erkin sóılep, ashyla túsýlerine septigi mol», - deıdi «Kúlkibastaý» quramasynyń jetekshisi Qanaǵat Júnisbekov.
Iá, jalpy Jaıdarman komandasy óz uıymdastyratyn festıváldi «Armandar oryndalatyn meken» degen uranmen (logomen) ótkizetini ázilsúıer qaýymǵa jaqsy tanys.
«Qazirgi kezde biz - eldegi ár aımaq, ár aýyldaǵy jas júrekterge jetip, uıymdastyrýshy ortaǵa aınalýǵa qadam bastyq. Jaıdarman zamanaýı kreatıvti ındýstrıanyń jasampaz qozǵalysyna aınaldy. Sol sebepti de bıylǵy jyl da Sanaly maýsym atalyp, jastar qozǵalysynyń 25 jyldyǵyn aıshyqtap otyr», - deıdi Jaıdarman qozǵalysynyń kóshbasshysy, «Qazaqstan KVN Odaǵy» Respýblıkalyq jastar qoǵamdyq birlestiginiń Prezıdenti Esen Eleýken.
Búginde otandyq kınoóndirýshiler 100 kıno túsirse, onyń 90-y osy Jaıdarmannan túlep ushqan jastar túsiredi nemese senarıin jazady eken. Akter bolyp, telearnalardyń efırlerin júrgizedi. Bir kezderi «Qazaqsha KTK» dep te atalǵan jaıdarmanshylardyń qazaq tilin damytýdaǵy orny ózine bólek áńgime. Qaı jaǵynan alǵanda da Jaıdarmannyń jastar úshin bereri mol alań ekenin ýaqyt óte kele dáleldenip keledi. Qazaqsha KVN-nen bastaǵan kezindegi jastar búginde aldyńǵy qatar aǵalarǵa aınaldy. Olardyń esimderi búgingi tańda elge jaqsy tanys. Otandyq telearnalarda kórip júrgen belgili akterler, shoýmender, efır júrgizýshileriniń kóbi alǵashqy qadamdaryn osy «Jaıdarmannan» bastaǵan. Synı oılaı alatyn kreatıvti jastar qaı zamanda da kerek. Sondyqtan bul salada jastar áli de talaı belesterdi baǵyndyryp, juldyz bop jarqyraıtyny anyq.
Mektep komandalary úshin jaqsy jańalyq, bıyl jas quramalar sany artty jáne kelesi oıyn Almatyda ótetin boldy.