Uly Jeńis merekesi qarsańynda «Amanat» partıasynyń Bostandyq aýdandyq fılıaly men Almaty qalalyq máslıhatynyń depýtaty Eraly Saýranbaev ǵasyr jasaǵan maıdanger, Uly Otan soǵysynyń ardageri Aleksandr Jýravlevti arnaıy quttyqtap, qurmet kórsetti.
Saltanatty kezdesýge Qurmanǵazy atyndaǵy Qazaq ulttyq konservatorıasynyń stýdentteri de qatysyp, úrmeli aspaptarda patrıottyq shyǵarmalar oryndap, ardagerge rýhanı syı jasady.
Aleksandr Stepanovıch Jýravlev 1925 jyly 30 mamyrda Reseıdiń Altaı ólkesinde dúnıege kelgen. 1943 jyly áskerge shaqyrylyp, Karel, keıin 1-shi Ýkraın maıdandarynda baılanysshy jáne barlaýshy retinde shaıqastarǵa qatysqan. Ol Elba ózeninen ótip, Berlın túbindegi urystarǵa deıin jetken. Soǵystan soń Býdapeshtte áskerı qyzmetin jalǵastyryp, 1950 jyly beıbit ómirge oralǵan.
Ardagerdiń jaýyngerlik erligi men beıbit ómirdegi eńbegi joǵary baǵalanyp, «Qurmet» ordenimen jáne «Jaýyngerlik erligi úshin», «Berlındi alǵany úshin», «Pragany alǵany úshin» medaldarymen marapattalǵan.
Erlik pen eldik úlgisin kórsetken ardagerge kórsetilgen bul qurmet – búgingi urpaqtyń alǵysy men taǵzymy. Jeńisti jaqyndatqan jaýyngerlerdiń ómir joly – el jadynda máńgi saqtalatyn uly amanat.