Almatyda ulandyqtar soǵys jylǵy bala – tyl ardageri, Ulttyq ulannyń ardageri, otstavkadaǵy maıor Ǵalymjan Bakeshevtiń úıiniń aýlasynda saltanatty is-shara uıymdastyryp, ardagerdi 90 jasqa tolǵan mereıtoıymen jáne Uly Jeńistiń 80 jyldyq merekesimen quttyqtady.
«Ońtústik» óńirlik qolbasshylyǵy Keńes Odaǵynyń Batyry gvardıa polkovnıgi Baýyrjan Momyshuly atyndaǵy 5571 áskerı bólimi komandıriniń tárbıe jáne áleýmettik-quqyqtyq jumystar jónindegi orynbasary podpolkovnık Ulyqbek Qaraev ardagerge alǵys hat tabystap, qolbasshylyq atynan quttyqtaý lebizin bildirdi, al óńirlik qolbasshylyqtyń Ardagerler keńesiniń músheleri jáne Hexlet İT kolejiniń oqytýshylary men stýdentteri tyl eńbekkerine arnaıy daıyndap kelgen syı-sıapattaryn berdi. Osydan soń ardager úıiniń aýlasynda Ulttyq ulannyń 5571 áskerı bóliminiń orkestri soǵys jyldaryndaǵy áskerı ánderdi oryndasa, ulandyq sarbazdar saltanatty marshpen júrip ótti.
– Tyl ardageri Ǵalymjan Júsipuly İshki áskerde uzaq jyldar qyzmet etip, zeınetke shyqqan. Biz Ǵalymjan ataǵa jıi kelip, jaǵdaıyn bilip, merekelerde quttyqtap otyramyz. «Ońtústik» óńirlik qolbasshylyǵynda qazir tek jalǵyz tyl ardageri bar. Qazynaly qarıamyzǵa árqashan qurmet kórsetemiz, - deıdi podpolkovnık Ulyqbek Qaraev.
Soǵys bastalǵanda Ǵalymjan ata nebary alty jasta edi. Ózi sıaqty býyny bekip, buǵanasy qatpaǵan balalardyń báriniń balalyq shaǵyn soǵys urlaǵan bolatyn. Olar eńbekke erte aralasyp, aýyldaǵy er-azamattardyń ornyn basty, analarymen birge tylda eńbek ete júrip, Jeńis kúniniń jaqyndaýyna úles qosty.
Qazir soǵys jylǵy balalar tyl ardagerlerine teńestirilgen, óıtkeni olardyń kóbi kishkentaı jasynan bastap maıdanǵa ketken eresekterdiń ornyn basty: zaýyttarda, kolhozdarda jumys istedi, sarbazdarǵa jyly kıim toqydy. Ǵalymjan aqsaqalǵa da osy mártebe berilgen. Sonymen qatar Ǵalymjan Júsipuly – Ulttyq ulannyń qart ardagerleriniń biri. Ol 1960 jyldan bastap KSRO-nyń İshki áskerinde ár túrli qyzmetterde bolǵan. KSRO İİM Qazaq SSR-i jáne Qyrǵyz SSR-i boıynsha İshki ásker basqarmasynda saıasat bóliminiń nusqaýshysy laýazymynda zeınetke shyqqan.
Ǵalymjan ata men jubaıy Qonyskúl apa áskerı orkestrdiń áýenimen dóńgelenip váls bılep, kóńilderi jadyrap, jasaryp qalǵandaı boldy.