Prezıdent Qasym-Jomart Toqaev Qazaqstan halqy Assambleıasynyń HHHİİ sesıasynyń otyrysynda eldiń ishki tutastyǵy Bas prokýratýra, İshki ister mınıstrligi, Ulttyq qaýipsizdik komıteti sıaqty quzyrly organdardyń nazarynda bolatynyn eske saldy, dep habarlaıdy almaty-akshamy.kz
«Árbir azamat óz bolashaǵyn Qazaqstanmen tyǵyz baılanystyrýy kerek. Sonda ǵana halqymyz birtutas el bolyp tura alady. Eshkimdi ultyna, tiline, dinine qarap kemsitýge bolmaıdy. Qoǵamda mundaı ustanymǵa saı bólektenýge jol berilmeıdi. Árqaısymyz – Qazaqstan atty qasıetti qara shańyraqtyń perzentimiz. Bárimiz – búgingi ómiri jáne bolashaǵy bir baýyrlas azamattarmyz», - dedi Qasym-Jomart Toqaev.
Sondaı-aq, Prezıdent etnosaralyq jáne til máselesindegi arandatý áreketterine zańmen qatań tyıym qoıylǵanyn eske saldy.
«Etnosaralyq, tildik jáne áleýmettik sıpattaǵy kez kelgen arandatý áreketiniń joly zań aıasynda qatań kesiledi. Bas prokýratýra, İshki ister mınıstrligi, Ulttyq qaýipsizdik komıteti bul máseleni erekshe nazarda ustap, zań boıynsha áreket etedi. Ár azamat óz sózi men áreketine jaýapkershilik sezinýi kerek. Emosıaǵa berilip, óshpendilik pen jekkórýshilikke boı aldyrýǵa bolmaıdy. Bóten aqparattyq soǵystar men ıdeologıalyq daýlar bizge qajet emes», - dedi Prezıdent.