2025 jylǵa deıin Araldyń 1,1 mln gektar aýmaǵyna sekseýil kóshetin otyrǵyzý josparlanǵan.
Ekologıalyq ahýaldy jaqsartý úshin Aral teńiziniń qurǵap qalǵan tabanynda fıtoormanmelıoratıvtik jumys júrgizilip jatyr, dep habarlaıdy Almaty-akshamy.kz.
Bul jaıynda Premer-Mınıstrdiń birinshi orynbasary Roman Sklárdyń Senat depýtattarynyń saýalyna bergen jaýabynda aıtty. Bıyl 188,8 myń gektar alqapqa 409,4 mln túp aǵash otyrǵyzý josparlanǵan.
«Qazirgi ýaqytta memlekettik orman qorynyń jalpy aýmaǵy - 30,5 mln gektar, onyń ishinde orman japqan aýmaq - 13,6 mln gektar. Memleket basshysynyń orman qory jerlerinde 2 mlrd túp aǵash otyrǵyzý tapsyrmasyn oryndaý maqsatynda ár óńirde ormandy molyqtyrý jáne aǵash ósirý keshendi jospary ázirlenip, bekitildi. Aıtalyq, 2021 jyly - 130 mln túp, 2022 jyly - 282 mln túp aǵash otyrǵyzylyp, jyldyq jospar 100 paıyz oryndaldy. Bıyl 188,8 myń gektar alqapqa 409,4 mln túp aǵash otyrǵyzý josparlanǵan», - dep atap ótti Úkimet basshysynyń birinshi orynbasary óz jaýabynda.
Onyń aıtýynsha, orman qoryn tolyqtyrý jónindegi is-sharalardy josparly júzege asyrý 2029 jylǵa qaraı orman japqan jer aýmaǵyn 14,5 mln gektarǵa deıin jetkizýge múmkindik beredi.