Joǵarǵy Sot Almaty sotynyń 2012 jylǵy sheshimin joıdy.
Bolat Nazarbaev Almaty aýyr mashına jasaý zaýytynyń aksıalaryn memleketke qaıtarady, dep habarlaıdy Almaty-akshamy.kz
Joǵarǵy Sottyń azamattyq ister jónindegi sot alqasy Qarjy mınıstrligi Memlekettik múlik jáne jekeshelendirý komıtetiniń talap-aryzy boıynsha Bolat Nazarbaev pen PLS-TM JSHS-ny Almaty aýyr mashına jasaý zaýytynyń aksıalaryn memleket menshigine qaıtarýǵa mindettedi.
Qaýly boıynsha, Memlekettik múlik jáne jekeshelendirý departamenti 1998 jyly "AMJZ" AQ-nyń jarǵylyq kapıtalynyń 31,9 paıyzy kólemindegi aksıalarynyń memlekettik paketin tender jeńimpazy – "Temir Kon" JSHS-ne 105,3 mıllıon teńgege satqan. Satyp alý-satý sharty boıynsha jańa ıelenýshi zaýyttyń profılin saqtap, ónim kólemin ulǵaıtýy kerek edi.
2007 jyly "Temir Kon" JSHS "AMJZ" AQ aksıalarynyń 86,78 paıyzyn, onyń ishinde memlekettik úlesiniń 31,9 paıyzyn Bolat Nazarbaevqa satty. 2009 jyly "Fırma Baıaý" JSHS zaýyttyń materıaldyq-tehnıkalyq bazasy qanaǵattanarlyqsyz jaǵdaıda, óndiristik kórsetkishter tómendep, múlik kesheni men jer ydyrap jatyr, ǵımarattar men qurylystar jalǵa nemese úshinshi tulǵalarǵa satylyp jatyr degen qorytyndyǵa keldi. Bul - mindettemelerdi oryndamaý. 2009 jyly Bolat Nazarbaev kelisimshart boıynsha eshqandaı mindettemelerdi oryndamaı, PLS-TM JSHS-niń basqa da aksıalarymen birge memleketke tıesili úlesti satqan.
"Memlekettik aksıalar paketiniń ıesi bola otyryp, Bolat Nazarbaev birinshi sharttyń erekshe talaptaryn oryndaý boıynsha mindettemelerdi ózine aldy. Bolat Nazarbaevtyń zaýyt qyzmetiniń beıinin saqtaý, óndiris kólemin ulǵaıtý, PLS-TM JSHS-men shart jasasqanda qaýipsizdik standarttaryn oryndaý jónindegi mindettemeleri toqtatylǵan joq. Bolat Nazarbaev daýly aksıalardy jańa satyp alýshyǵa óz mindettemelerin bermeı ıelikten shyǵarýǵa quqyly emes edi", - delingen qaýlyda.
Qaýlyǵa sáıkes, túrli sot organdary bul isti birneshe ret qaraǵan. 2011 jylǵy aqpanda Komıtet bergen talap-aryzdy Almaty Áýezov aýdanynyń №2 soty qanaǵattandyrdy. Almaty qalalyq sotynyń apelásıalyq jáne kasasıalyq sot alqalary bul sheshimdi qoldaǵan. Alaıda, 2012 jyly Joǵarǵy Sottyń sot alqasy sheshimniń kúshin joıyp, isti birinshi satydaǵy sotqa qaıta qaraýǵa jiberdi. Bul joly Almaty Áýezov aýdanynyń №2 aýdandyq soty Komıtetke talapty qanaǵattandyrýdan bas tartty. Sheshimdi Almaty sotynyń azamattyq jáne ákimshilik ister jónindegi apelásıalyq sot alqasy rastady. Alaıda bıyl Bas prokýror bul sheshimdi daýlaý týraly sheshim qabyldady.
Bolat Nazarbaev ta, memlekettik múlik komıtetiniń ókilderi de sot otyrysyna kelmegen. Bas prokýrordyń dálelderin zerdelegennen keıin Joǵarǵy sot alqasy daýly sot aktilerin kasasıalyq tártippen qaıta qaraý úshin aıryqsha negizder bar degen qorytyndyǵa keldi.
Joǵarǵy Sot Bas prokýrordyń narazylyǵyn qanaǵattandyryp, Almaty sotynyń 2012 jylǵy sheshimin joıdy.
"Bolat Nazarbaev pen PLS-TM JSHS arasynda jarǵylyq qordyń 31,9 paıyzy "Almaty aýyr mashına jasaý zaýyty " AQ-nyń jaı ataýly aksıalaryn satý bóliginde jasalǵan 2009 jylǵy 2 sáýirdegi baǵaly qaǵazdardy satyp alý-satý sharty jaramsyz dep tanylsyn. Taraptardy bastapqy qalypqa keltirý kerek. Bolat Nazarbaevqa "AMJZ" AQ-nyń qarapaıym ataýly aksıalaryn zaýyttyń jarǵylyq kapıtalynyń 31,9 paıyzy mólsherinde memleket menshigine qaıtarýǵa mindettelsin", - delingen qaýlyda.