Almaty-akshamy.kz saıtynda búgin jaryq kórgen jańalyqtarǵa sholý – kún kerýeni
Prezıdenttiń Shyǵysqa sapary
Qasym-Jomart Toqaev Shyǵys Qazaqstan oblysyna jumys saparymen bardy. Sapar aıasynda Memleket basshysy Óskemen qalasyndaǵy kópbeıindi Onkologıa jáne hırýrgıa ortalyǵynyń bazasynda ashylǵan Sáýlelik terapıa jáne dıagnostıka ortalyǵyna bardy. Sonymen qatar D.Serikbaev atyndaǵy Shyǵys Qazaqstan tehnıkalyq ýnıversıtetine baryp, joǵary oqý ornynyń qyzmetimen tanysty jáne onyń bazasynda qurylǵan «Lý Ban sheberhanasy» oqý ortalyǵyn aralap kórdi.
Toqaev Erdoǵandy quttyqtady
Rejep Taııp Erdoǵandy 70 jasqa tolǵan mereıtoıymen quttyqtap, izgi tilegin jetkizgen Qasym-Jomart Toqaev onyń kóregen saıasaty men qajyrly eńbeginiń arqasynda baýyrlas eldiń odan ári qarqyndy damyp, halyqaralyq qoǵamdastyqtaǵy bedeli arta túsetinine senim bildirdi. Sonymen qatar taraptar Qazaqstannyń Túrki memleketteri uıymyna tóraǵalyǵy kezindegi kún tártibiniń júzege asyrylý barysyn talqylady.
Qaraǵandyda zaýyt órtendi
Zardap shekkender joq. Órt 08.22-de tolyǵymen óshirildi. QR Tótenshe jaǵdaılar mınıstrliginiń habarlaýynsha, saǵat 06:32-de Qaraǵandy qalasynyń Á.Bókeıhanov aýdanynda «Parhomenko atyndaǵy Qaraǵandy mashına jasaý zaýyty» JSHS aýmaǵynda seh shatyrynyń aǵash jabyny órtendi.
Araldy sekseýil qutqara ma?
Teńizdiń ultanyna 10 000 sekseýil kósheti otyrǵyzylady. Bul joba Aral teńiziniń ekojúıesin qalpyna keltirýge atsalysýdy kózdeıdi. 1-3 naýryz kúnderi Qazaqstanda eriktilerdiń alǵashqy ekologıalyq jobasy bastalady.
Jobany QR Ekologıa mınıstrligi, Qyzylorda oblysynyń ákimdigi jáne halyqaralyq Araldy qorǵaý qory men AlmaU ýnıversıtetiniń mamandary uıymdastyrady.
Segizinshi saılaý
Belarýs prezıdenti Aleksandr Lýkashenko 2025 jylǵy Belarýs prezıdenti saılaýyna qatysatynyn málimdedi. El prezıdenti jáne Qarýly kúshterdiń Bas qolbasshysy qyzmetindegi Aleksandr Lýkashenko 1994, 1999, 2001, 2006, 2010, 2015, 2020 jyldarda ótken saılaýlardyń bárine qatysqan. Ol qatarynan segizinshi merzim saılaýǵa túspek.
72 mlrd teńgeniń shulyǵy
Ótken jyldyń jeltoqsanynda qazaqstandyqtar 72 mlrd teńgeniń shulyǵyn kıipti. Mamandar bul kórsetkish 2022 jyldyń jeltoqsanymen salystyrǵanda 18 ese kóp ekenin aıtady.
«Ónimderdiń túgelge jýyǵy shetelden keledi. Dollarmen eseptegende, bir aıda shulyq buıymdary ımportynyń kólemi 157 mıllıondy quraǵan. Bul 2022 jylǵy jeltoqsanmen salystyrǵanda, 20 esege kóp. Sonyń túgelge jýyǵy Qytaıdan kelgen maqta shulyq buıymdarynyń úlesine tıedi – 20,3 mıllıon jup», - delingen habarlamada.
Juma namazy neshede oqylady?
1 naýryzdan bastap bir ýaqyt beldeýine kóshýine baılanysty juma namazyn oqý ýaqyty ózgeredi. Mundaı sheshim 21 aqpanda ótken QMDB Ǵulamalarynyń keńesinde qabyldandy.
Júk kólikterine shekteý engiziledi
Respýblıkalyq mańyzy bar joldardy qystan keıin saqtaý jáne kútip ustaý úshin bir oske júktemesi 8 tonnadan asatyn avtokólik quraldarynyń qozǵalysyn ýaqytsha shekteý engiziledi. Atalǵan ýaqytsha shekteý sharalary 1 naýryzdan 1 sáýirge deıin qoldanylady.
Bıshimbaevtyń isi sotqa jiberildi
Bul týraly zardap shekken taraptyń qorǵaýshylary málimdedi. Buǵan deıin ishki ister mınıstriniń orynbasary barlyq sot medısınalyq saraptama aıaqtalǵan soń ǵana is sotqa jiberiletinin aıtqan. Qýandyq Bıshimbaev áıeli Saltanat Núkenovany «qatigezdikpen óltirdi» degen kúdikpen qamalǵan bolatyn. Oqıǵa 2023 jyly 9 qarashada Astana qalasyndaǵy «BAU» meıramhanasynda bolǵan.
Boksshy prezıdent
Gennadıı Golovkın Ulttyq Olımpıada komıtetiniń prezıdenti bolyp saılandy. Qoǵamdyq birlestiktiń basshysyn saılaý jabyq esik jaǵdaıynda ótni. Oǵan jýrnalıser shaqyrylǵan joq. Byltyr Gennadıı Golovkın resmı túrde IBO tujyrymy boıynsha orta salmaqtaǵy álem chempıony ataǵynan bas tartty. Bul onyń osy kezge deıingi sońǵy ataǵy edi.