Otyz jyldan beri kóshtiń túzelgenin kórmedik
Almatyda QR Májilis depýtattary, zıaly qaýym ókilderi, til salasynyń mamandary, pedagogtar, qoǵam belsendileri men jýrnalıserdiń qatysýymen «Aralas mektep qazaqty qaıda aparady?!» atty dóńgelek ústel ótti, dep habarlaıdy Almaty-akshamy.kz Baq.kz saıtyna silteme jasap.
HHİ ǵasyr. Qazaq halqynyń keleshegi qandaı? Bul suraq el erteńin oılaıtyn ár azamatty tolǵandyrady. Ásirese bilim salasy, memlekettik tildiń jaǵdaıy, ult rýhanıatynyń búgingi ahýaly, ulttyq birtutastyqty saqtaý jolyndaǵy túrli máseleler óz sheshimin tappaı otyr. Sonyń eń negizgisi – elimizdegi aralas mektepterdiń dúbára, tili men dilinen adasqan urpaq tárbıeleýdiń ordasyna aınalǵandyǵy.
Sharany uıymdastyrýshylardyń biri aqyn Toqtaráli Tańjaryq «Qazaq ádebıeti» gazetiniń №7 sanynda til janashyry Bekzákir Quralbaevtyń «Almaty dúbáralardyń ordasyna aınaldy. Aralas mektepterdi jabý kerek» degen kólemdi suhbaty jaryq kórgenin, osydan keıin qoǵamdyq ortada qyzý pikir qalyptasqanyn aıtty.
«Elimizdegi zıaly qaýym ókilderi ún qosyp, aralas mektepterden bilim alatyn oqýshylardyń deni orystildi, bógde rýhty bolyp ósetinin aıtyp, dabyl qaqty. Aıtalyq, Almaty qalasynda memlekettik mektepterdiń sany 207 bolsa, sonyń 70-i qazaq, 64-i orys, 3-i uıǵyr, al 70-i aralas mektep eken. Bul jerde aralas mektepterdiń deni orystildi urpaq tárbıelep shyǵaratynyn eskersek, máseleniń qanshalyqty kúrdeli ekeni belgili. Munan syrt, 60-tan astam jekemenshik bilim ordalary jumys isteıdi. Olar da aralas mektepterdiń sanyn arttyryp otyr», -dedi aqyn.
Jıynǵa qatysýshylar elimizdegi aralas mektepterdi jabý qajettigin qoldaıtyndaryn aıtyp, taza qazaq tilinde sabaq beretin mektep sanyn arttyrý jóninde usynytaryn jetkizdi.
Qoǵam qaıratkeri Amalbek Tyshanov «kósh júre túzeledi» degen sózden arylyp, naqty iske kóshý qajettigin aıtty.
«Otyz jyldan beri kóshtiń túzelgenin kórmedik. Qalyqtyń talabyna qulaq túreıik degen basshylyq ta, júıeli sharada bolǵan joq. Qoǵamdyq uıymdardyń talaby qanshalyqty bılikke jetip jatyr? Til máselesinde barlyq uıymdar bas qosý kerek, sol kezde ǵana bılikke óz talabyn oryndata alady»,-dedi A. Tyshanov.