Aldaǵy referendým ýnıversıtet stýdentterine de túsindirile bastady
Konstıtýsıaǵa engizilgen ózgerister boıynsha referendým ótkizýdi qoǵamdyq qoldaý jónindegi qalalyq shtab basshysy Rahman Alshanov, Olesá Klımenko men Jomart Qudaıbergenuly 200 stýdent pen oqý orny qyzmetkerleri jınalǵan kópshilik aldynda sóz sóıledi.
Rahman Alshanov referendýmda ár qazaqstandyqtyń daýysy mańyzdy ekenin alǵa tartyp, zań boıynsha halyqtyń kem degende 50%-y referendýmǵa qatyspasa, onyń nátıjesi joqqa shyǵarylatynyn basa aıtty. Shtabtyń taǵy bir múshesi, jýrnalıs Olesá Klımenko aldaǵy referendým bizdiń tutastyǵymyz ben birligimizdiń kórinisi bolatynyn atap ótti.
«Men kóp jyldan beri etno-mádenı salada jumys istep kelemin. Nemis gazetiniń redaktory qyzmetin atqaramyn. Osy jyldyń 5 maýsymynda ótetin referendýmdy jalpyulttyq dep ataýǵa tolyq negiz bar. Sebebi, halyq daýys berý arqyly óziniń birligin, belsendi azamattyq ustanymyn, Jańa Qazaqstandy qurýǵa nıetin kórsetedi. Aıtyp otyrǵan ózgerister sońǵy bir-eki aıda paıda bolǵan dúnıe emes, halyqtyń jyldar boıy eldi basqarýǵa degen talpynysynan týǵan qajettilik. Sondyqtan el taǵdyryna beı-jaı qaraı almaıtyn ár azamat daýys berýge qatysady dep oılaımyn», – dedi jýrnalıs.
Al saıası ǵylymdar doktory Jomart Qudaıbergenuly referendýmnyń tek saıası jaqtaryna toqtalyp, ózgeristerdiń áserin jastarǵa túsindirdi.
Jıyn sońynda stýdentter men oqytýshylar túsinbegen jerlerin surap, óz usynystaryn bildirip jatty. Kishigirim pikirtalas ótti desek te bolady.