Memleket basshysy «Arýana» úzdik áıelder jobasy baıqaýynyń jeńimpazdaryn marapattady
Memleket basshysy Qasym-Jomart Toqaev 8 naýryz – Halyqaralyq áıelder kúnine arnalǵan merekelik is-sharaǵa qatysty, dep habarlaıdy Almaty-akshamy.kz Aqordanyń resmı saıtyna silteme jasap.
Prezıdent áıelder qaýymyn 8 naýryz merekesimen quttyqtap, ultymyzdyń dúnıetanymynda áıeldiń orny erekshe ekenin atap ótti. Sondaı-aq Memleket basshysy sulýlyq pen náziktik, meıirim men shapaǵat – bári de áıelderden bastaý alatynyn jetkizdi.
«Shyn máninde, árbir adam úshin anadan uly, anadan qymbat eshkim joq. Eń qasterli qundylyqtarymyz «Jer-ana», «Otan-ana» uǵymdarymen tyǵyz baılanysty. «Ata uldy, ana ultty tárbıeleıdi» deıdi. Bul sózdiń aıryqsha mán-mańyzy bar. Ult bolashaǵy urpaq tárbıesinen bastalady. Ár balanyń jetistigi – ana mahabbatynyń jemisi. Uly Abaı aıtqan «Tolyq adamǵa» tán asyl qasıetter urpaqtyń boıyna ana arqyly darıdy», – dedi Prezıdent.
Qasym-Jomart Toqaev «Jastarǵa salynǵan qarajat – eń utymdy ınvestısıa» ekenin atap ótti.
«Qazir qyzdarymyz álemniń eń úzdik ýnıversıtetterinde bilim alyp jatyr. Jahandyq kompanıalarda jumys isteıdi. San túrli kásipti meńgergen áıelder qoǵamnyń túrli salasynda tabysty eńbek etip júr. Olardyń arasynda muǵalim, dáriger, memlekettik qyzmetshi, tárbıeshi, tiginshi jáne basqa da mamandyq ıeleri bar. Halyqaralyq jarystarda kók týymyzdy bıikke kótergen sportshy arýlarymyz da az emes. Qanshama qyz-kelinshekter bıznespen aınalysyp, myńdaǵan adamǵa jumys usynyp otyr. Men barshańyzdy maqtan etemin! Sizderge shynaıy rızashylyǵymdy bildiremin», – dedi Memleket basshysy.
Saltanatty jıyn sońynda Memleket basshysy «Arýana» úzdik áıelder jobasy baıqaýynyń jeńimpazdaryn marapattady. Bul marapat ártúrli salada áleýmettik mańyzy bar jobalarmen aınalysyp, azamattyq qoǵamnyń damýyna eleýli úles qosyp júrgen isker áıelderge on nomınasıa boıynsha tabystaldy.
Halyqaralyq áıelder kúnine oraı ótkizilgen «Arýana» úzdik áıelder jobasy baıqaýy jeńimpazdarynyń tizimi:
1. «Agrobıznes salasyndaǵy úzdik joba» nomınasıasy boıynsha – Aqshalova Aıgúl Saǵymbekqyzy;
2. «Úzdik IT joba» nomınasıasy boıynsha – Aqsholaqova Farıda Amantaıqyzy;
3. «Kreatıvti ındýstrıa salasyndaǵy úzdik joba» nomınasıasy boıynsha – Salıhova Sáýle Halelqyzy;
4. «Jańa medıa salasyndaǵy úzdik joba» nomınasıasy boıynsha – Nurǵalıeva Ásem Bolatjanqyzy;
5. «Áıelder men balalar quqyǵyn qorǵaý salasyndaǵy úzdik joba» nomınasıasy boıynsha – Básenova Nesibeli Zarıvanqyzy;
6. «Inklúzıvti damý salasyndaǵy úzdik joba» nomınasıasy boıynsha – Álimjanova Araılym Maǵashqyzy;
7. «Ǵylym jáne ınovasıa salasyndaǵy úzdik joba» nomınasıasy boıynsha – Derkach Marına Vladımırovna;
8. «Áıelder men balalardyń belsendi quqyq qorǵaýshysy» nomınasıasy boıynsha – Rakısheva Lázzat Bekmuhanbetqyzy;
9. «Kásiporynnyń úzdik áıel basshysy» nomınasıasy boıynsha – Tóleeva Fatıma Nabıdýllaqyzy;
10. «Áıelder quqyqtaryn qorǵaý salasyndaǵy úzdik úkimettik emes uıym» nomınasıasy boıynsha – Ryl Olga Vladımırovna.