«Black Canvas» halyqaralyq zamanaýı kınematografıa kınofestıvali
Meksıka astanasynda qazaqstandyq «Aqyn» fılminiń kórsetilimi ótti, dep habarlaıdy Almaty-akshamy.kz BAQ.KZ-ke silteme jasap.
Bul jumys bıylǵy jyldyń 30 qyrkúıegi men 9 qazany aralyǵynda Mehıko qalasynda ótken «Black Canvas» halyqaralyq zamanaýı kınematografıa kınofestıvaliniń «Kórnekti avtorlar» segmentinde usynyldy.
Fılmniń kórsetilimi aldynda onyń rejıseri Dárejan Ómirbaevtyń meksıkalyq kınosúıer qaýymǵa úndeýin Qazaqstannyń Meksıkadaǵy ýaqytsha senimdi ókili Oljas Isabekov jetkizdi. Dárejan Ómirbaev uıymdastyrýshylarǵa alǵysyn bildirip, onyń fılmi osy shalǵaı elde óz kórermenin tabady degen senim bildirdi. Al onyń aıtqany durys bolyp shyqty: qazaq fılmi sátti shyǵyp, kınofestıvalde eki márte kórsetildi.
«Aqyn» ıspan tilindegi sýbtıtrmen túpnusqa daýysta kórsetildi. Kınofestıval uıymdastyrýshylarynyń ótinishi boıynsha Qazaqstannyń Mehıkodaǵy Elshiligi men Gvadalaharadaǵy elimizdiń Qurmetti konsýly Horhe Gonsales sýbtıtrlerdi shyǵarýǵa járdemdesti.
Bıyl «Black Canvas» kınofestıvalinde barlyǵy 125-ten astam fılm usynyldy, onyń 59-y sheteldik. Kóptegen fılmder ártúrli ýaqytta basqa iri kınofestıvalderde – Venesıada, Torontoda, Kannda jáne t.b. kórsetildi.
«Aqyn» buǵan deıin Japonıada, Brazılıada jáne «Berlinale» festıvalinde joǵary baǵa alǵany málim.
Aıta keteıik, «Aqyn» fılmin Sh.Aımanov atyndaǵy «Qazaqfılm» AQ Mádenıet jáne sport mınıstrligi tapsyrysy boıynsha «Ulttyq kınony qoldaý memlekettik ortalyǵy» qoldaýymen túsirgen.