Jyldamdyqty asyrǵan júrgizýshilerge aıyppul salynady.
IIDM Avtomobıl joldary komıteti tóraǵasynyń orynbasary Amangeldi Bekovtiń aıtýynsha, Qazaqstandaǵy 11 myń aqyly jolǵa «Sergek» kameralary ornatylady, dep habarlaıdy Almaty-akshamy.kz
Elimizde jyl saıyn 2 myńnan asa adam kólik apatynan kóz jumady. Apatqa basty sebeptiń biri – júrgizýshilerdiń kólik jyldamdyǵyn asyrýy.
«Júrgizýshiler jolda jyldamdyqty asyrady. Astana – Býrabaı tas jolynda barlyq kamera istep tur. Onda saǵatyna 140 shaqyrym jyldamdyqpen júrýge ruqsat berilgen. Alaıda júrgizýshiler saǵatyna 180-200 shaqyrym jyldamdyqpen júredi. Osylaısha, olar jol qaýipsizdigi erejesin buzady. Qazaqstandaǵy joldardyń basym bóligi eki jolaqty. Saldarynan (júrgizýshiler jyldamdyqty asyryp, – avtor) joldyń qarsy baǵytyna shyǵyp ketedi. Sosyn adam ólimi kóp tirkeledi», - dedi Amangeldi Bekov OKQ-da ótken baspasóz máslıhatynda.
Osyǵan baılanysty Indýstrıa jáne ınfraqurylymdyq damý mınıstrligi 2030 jylǵa deıin aqyly joldarǵa «Sergek» kameralaryn ornatýdy josparlap otyr.
«Joba boıynsha Qazaqstandaǵy 25 myń shaqyrym joldyń 11 myńyn aqyly boldyrýdy josparlap otyrmyz. Osy 11 myń jolda kameralar bolady. Osy respýblıkalyq mańyzy bar, aqyly jolardardyń boıyna 94 kamera ornattyq. Qazir onyń 33-i jumys istep tur», - dedi Komıtet tóraǵasynyń orynbasary.
Onyń aıtýynsha, joldarǵa ornatylatyn kameralar «Sergek» sıaqty jumys isteıdi.
«Qazir biz İshki ister mınıstrligimen birlesip, kameralardy iske qosyp jatyrmyz. Onda kamera kóliktiń jyldamdyǵyn tekseredi. Júrgizýshi jyldamdyqty asyrsa, oǵan aıyppul salynady. Júrgizýshilerdiń tártibin baqylasaq, bul kólik apatynan qaza tabatyndardyń sanyn azaıtýǵa múmkindik beredi», - dedi Amangeldi Bekov.