Londonda álemge áıgili apaly-sińlili Naqypbekovalar týraly derekti fılmniń tusaýkeseri bolyp ótti.
Kórkem týyndy klasıkalyq ónerdiń qas sheberleri, qazaqtyń mýzykant qyzdarynyń taǵdyry týraly syr shertedi. Elvıra, Eleonora jáne Alfıa Naqypbekovalar - álemdegi eń úzdik fortepıanolyq trıolardyń biri, dep habarlaıdy Almaty-akshamy.kz Qazaqstan.tv-ǵa silteme jasap.
Olar Sovettik Qazaqstanda, Qaraǵandyda týylyp, mýzykalyq bilim alǵan. Máskeýde konservatorıada oqyp, halyqaralyq baıqaýlarda úzdik dep tanylǵan. Shyǵarmashylyq erkindik ańsaǵan úsh qyz batysty baǵyndyrý úshin elden ketip qalady. Sekseninshi jyldardyń sońynda Londonda bastary birigedi. Búginde shetelde «Bekovalar trıosy» degen atpen tanymal. Fılmde vırtýozdardyń osy ómir joly týraly baıandalady.
«Adamdardyń ómirin qysqa derekti fılmde kórsetý jáne ótken tarıhqa tereń úńile bilý óte qıyn. Bul turǵyda týyndy sátti shyqty dep oılaımyn. Rejıser men shyǵarmashylyq toptyń eńbegi orasan», - deıdi mýzykant Alfıa Naqypbekova.
«Endi ómir degen uzaq emes qoı. Biraz jasqa kelip jatyrmyz bárimiz de. Muny tarıhqa kirgizý úshin, erteń ókinip qalmaý úshin buny búgin emes erteń bárimiz baǵalaımyz. Sondaı oımen osy fılmdi qurdyq», - deıdi «Bekovalar: erkindikke jol» derekti fılmniń prodúseri Berlın Irıshev.