Almatyda bilim berýdegi jańa tehnologıalar jónindegi EdCrunch Reload 2022 «Aqyl-oı men tehnologıalardyń toǵysýy» halyqaralyq konferensıa ótip jatyr
Respýblıka saraıynda Almaty qalasynyń ákimi Erbolat Dosaev, Oqý-aǵartý mınıstri Asqat Aımaǵambetov jáne Ǵylym jáne joǵary bilim mınıstri Saıasat Nurbektiń qatysýymen EdCrunch Reload 2022 halyqaralyq konferensıa bastaldy, dep habarlaıdy Almaty-akshamy.kz.
İs-sharaǵa 25 elden 350 sarapshy qatysqan. Olardyń ishinde Izraıl, Fınlándıa, Ózbekstan, Ázirbaıjan, Armenıa elderiniń ǵylym jáne bilim mınıstrleri, sonymen qatar, álemdik deńgeıdegi jıyrmadan astam jetekshi ýnıversıtettiń rektorlary bar.
EdCrunch spıkerleri arasynda Minerva ınovasıalyq ýnıversıtetiniń negizin qalaýshy Ben Nelson, General Assembly oqytý jáne ınovasıalar jónindegi vıse-prezıdenti Devıd Porkaro, London Koróldik kolejiniń genetıka profesory Robert Plomın, álemdegi alǵashqy Lab of Misfits neırodızaın stýdıasynyń negizin qalaýshy Bo Lotto jáne bilim berý salasyndaǵy kóptegen basqa halyqaralyq sarapshy bar. Alqaly jıynǵa Qazaqstan atynan mektep dırektorlary, JOO rektorlary, muǵalimder, tárbıeshiler jáne oflaın jáne onlaın formatta qatysqan 20 myńnan astam adam jınaldy.
Konferensıa barysynda sarapshylar oqytýdyń gıbrıdti formaty, mektep jasyna deıingi balalardyń ıntellektisin damytý, sıfrlyq transformasıaǵa beıimdelý, Big Data paıdalaný múmkindikteri, bilim berý keńistigin jobalaý jáne t.b. máseleni talqylady.
23 jáne 24 qarashada konferensıa kúnderi is-shara qonaqtary úshin EdCrunch Expo ınteraktıvti kórmesi uıymdastyryldy, onyń aıasynda oflaın jáne onlaın rejımde jańa EdTech ónimderimen, olardyń avtorlarymen tanysyp, kezdesý ótkizýge, jetkizýshiler men seriktester tabýǵa bolady.