Túrki mádenıeti jáne murasy qorynyń Prezıdenti Aqtoty Raıymqulova Polshaǵa sapary aıasynda Polsha Respýblıkasynyń Senaty vıse-marshaly Mıhal Kamınskıımen kezdesti, dep habarlaıdy aqshamnews.kz
«Ádebıet jáne kórkemóner» portalynyń habarlaýynsha, qor delegasıasynyń Polshaǵa sapary barysynda ekijaqty yntymaqtastyqty nyǵaıtýǵa baǵyttalǵan birqatar kezdesýler ótti. Atap aıtqanda, túrki álemi men Polsha arasyndaǵy mádenı baılanystardy damytý, birlesken jobalardy júzege asyrý jáne mádenı murany saqtaý máseleleri talqylandy.
Kezdesý barysynda Aqtoty Raıymqulova Túrki mádenıeti jáne murasy qorynyń túrki halyqtarynyń mádenı jáne tarıhı murasyn saqtaý men nasıhattaý baǵytynda atqarǵan jumystary týraly baıandady. Sondaı-aq, Polshadaǵy túrki tektes qaýymdastyqtar – tatarlar men qaraıymdardyń mádenı murasyn zertteý men saqtaý salasynda birlesken bastamalardy qolǵa alýdyń mańyzdylyǵyn atap ótti.
Óz kezeginde, Polsha Senatynyń vıse-marshaly Mıhal Kamınskıı tarıhı jáne mádenı murany saqtaýǵa Polsha úlken mán beretinin jetkizip, túrki álemimen mádenı baılanystardy damytýǵa múddeli ekenin bildirdi.
Kezdesýge Ázerbaıjan Respýblıkasynyń Polshadaǵy Elshisi Nárgiz Qurbanova men Qazaqstan Respýblıkasynyń Polshadaǵy Elshisi Álim Kirabaev qatysyp, taraptardy qyzyqtyrǵan ózge de máseleler boıynsha pikir almasty.