Aqtóbe oblystyq máslıhatynyń depýtaty, kásipker Samat Qaldyǵulov sý tasqyny kezinde baspanasy sýǵa ketken turǵyndarǵa kómek qolyn sozǵysy keletinin aıtty.
Ol týǵan jeri – Alǵa aýdany Amankeldi aýylynan sý tasqynynan zardap shekken 10 otbasyǵa úı tartý etpek, dep habarlaıdy Almaty-akshamy.kz.
Depýtattyń aıtýynsha, aýylda mal baǵý arqyly mol tabys tabýǵa bolady. Búginde atalǵan aýylda mektep, klýb, feldsherlik pýnkt bar. Mekemeler ınternetke qosylǵan.
«Bıylǵy sý tasqyny kezinde qalada qanshama otbasynyń baspanasyna sý kirip, ábigerge tústi. Qazir olarǵa memleket tarapynan qajetti kómek kórsetilip jatyr. Degenmen meniń usynysym osy: qalada jeke baspanaǵa qoly jetpeı júrgenderge nemese qıyndyqtarǵa tap bolǵan otbasylarǵa qoldaý bildirgim keledi. Olarǵa óz qarjymnan úı tartý etýge daıynmyn. Jumyspen de qamtamasyz etemin», deıdi depýtat.
Aqtóbe oblysy ákimdiginiń málimetinshe «Reımqul» SHQ ujymynyń kúshimen Amankeldi aýylynda monsha salynyp, mektep ǵımaraty jóndelgen. 86 mıllıon teńgeden astam somaǵa sý qubyry júıesi tolyǵymen jańartylyp, elektr sorǵylary aýystyrylǵan. Mádenıet úıi de salynǵan. Aýdan ortalyǵynan 60 shaqyrym qashyqtyqta ornalasqan aýylda baqsha egip, mal baǵýǵa múmkindik mol.