Aqtóbede júzden asa adamdy san soqtyrǵan halyq emshisi 6 jyl 8 aıǵa sottaldy. Biraq ol jazasyn eki jyldan soń ǵana óteıdi. Sebebi sýdıa kishkentaı eki balasyn eskergen, - dep habarlaıdy Aqshamnews.kz tilshisi "KTK" telearnasyna silteme jasap.
"Alty jyl segiz aıǵa bas bostandyǵynan aıyrý jazasy taǵaıyndaldy. Sonymen qatar, QR QK 74-baby 1-bóliginde sottalýshynyń kishkentaı balasynyń bolýyna baılanysty jazasyn oryndaýdy eki jylǵa keıinge qaldyrdy. Ol zańda belgilengen, kórsetilgen", - dedi Aqtóbe №2 sotynyń sýdıasy Tursynhan Salyqov.
Buǵan deıingi sot otyrystarynda qatysýshylardyń kóptiginen ıne shanshar oryn bolmaıtyn. Al úkimdi tyńdaýǵa kelgende kópshilik jınala qoımady. Sulýshash esimimen óńirge tanymal kelinshek naýqastarǵa mıllıondap nesıe aldyrǵan. Qyzyǵy sol, aldanǵandar qalaı basy aınalyp qalǵanyn bilmeıdi. Sotta naqty jábirlenýshi dep 136 adam tanyldy. Onyń ishinde emshiniń et jaqyn týystary da, synyptastary men aýyldastary da bar.
Emshi "dem salamyn" dep báriniń basyn aınaldyrǵan. Keıbirine meshit pen medısınalyq ortalyqtyń qurylysyna, endi bireýlerge múgedek balamnyń emine qajet dep aqsha suraǵan. Jábirlenýshiler gıpnozda júrgendeı kúı keshtik, nesıeni qalaı alyp, qolma-qol qalaı sanap bergenimizdi bilmeı qaldyq dep otyr. Halyq emshisiniń keltirgen jalpy shyǵyn kólemi 579 mıllıon teńgeden asady. Biraq bul soma taǵy artýy múmkin. Sebebi, jábirlenýshilerdiń bank aldyndaǵy qaryzy da aı saıyn kóbeıip otyr. Ony sottalýshy óteýge mindetteldi. Al emshiniń advokaty úkimge rıza.
"Qazbaeva Sulýshash ózi shyǵyndardy, halyqtan alǵan nesıelerin óteýge, sot májilisi kezinde de bárin ózi aıtty. "Men óteımin, eshkimniń aqshasyn jemeımin" dedi. Endi bul jaǵdaı onyń qarjy saýatsyzdyǵynan dep oılaımyn", - dedi advokat Elmıra Jumabaeva.