Rrelefti kompozısıanyń bıiktigi 5 metr, al uzyndyǵy 7 metr
Aqtóbede Alash qaıratkerleri beınelengen «Azattyqtyń aq tańy» memorıaldyq kesheni ashyldy, - dep habarlaıdy Almaty-akshamy.kz qala ákimdiginiń baspasóz qyzmetine silteme jasap.
Keshenniń ashylýyna «Alash urany» gımni oryndalyp, «Alash» partıasynyń týy kóterildi. Sharaǵa oblys ákimi Ońdasyn Orazalın, Temirbek Júrgenov pen Uzaqbaı Qulymbetovtiń týystary, qoǵam qaıratkerleri men óńirdiń ǵylymı zıaly qaýym ókilderi qatysty.
Memorıaldyq keshenge «Alash» partıasynyń Álıhan Bókeıhan, Ahmet Baıtursynov, Mustafa Shoqaı, Halel Dosmuhamedov, Mirjaqyp Dýlatov, Jahanshy Dosmuhamedov, Maǵjan Jumabaev, Teljan Shonanov, Temirbek Júrgenov, Uzaqbaı Qulymbetov, Muhamedjan Tynyshbaev syndy belgili qaıratkerleriniń barelefti beıneleri bar.
Álıa Moldaǵulova men Táýelsizdik dańǵyldarynyń qıylysynda ornalasqan relefti kompozısıanyń bıiktigi 5 metr, al uzyndyǵy 7 metr. Joba avtory - músinshi Jeńis Jubanqosov.
«Búgingi urpaq Táýelsizdik úshin kúresken azamattardy ulyqtap, olardyń taýqymetke toly taǵdyrynan taǵylym alýǵa tıis. Tarıhtan taǵylym almaǵandar úshin qasyret árdaıym qaıtalanady. Búgingi "Azattyqtyń aq tańy" tarıhı kesheni Táýelsizdik jolynda kúresken Alash qaıratkerlerine, olardyń murasyna degen adaldyǵymyzdy ańǵartý maqsatynda ashylyp otyr!», - dedi Ońdasyn Orazalın quttyqtaý sózinde.
Shara sońynda qonaqtar memorıaldy keshenge gúl shoqtaryn qoıdy.