Sebebi tórt jasar balasynyń týý týraly kýáligi joq
Aqtaýlyq áıel balasymen qujattary bolmaǵan soń Kıevten shyǵa almaı otyr. Sebebi ýkraınalyq tarap úsh jyl boıy balanyń týý týraly kýáligin berýden bas tartqan. Qazaqstannyń Ýkraınadaǵy elshiligi jaǵdaıǵa qatysty pikir bildirdi, dep habarlaıdy Almaty-akshamy.kz Azattyq Rýhy portalyna silteme jasap.
Lada.kz portalynyń málimetinshe, Kıevte balasymen turyp jatqan áıeldiń anasy Tatána Jejeldiń aıtýynsha, qyzy Aqtaýǵa shyǵa almaıdy. Sebebi tórt jasar balasynyń týý týraly kýáligi joq, tek perzenthanadan anyqtama bar.
«Ýkraına tarapy bala dúnıege kelgen sátten bastap týý týraly kýálik berýden bas tartty, óıtkeni balanyń ákesimen neke tirkelmegen. Bizdiń konsýldyq balanyń týǵan jeri boıynsha AHAJ-ǵa barsyn dedi, al olar konsýldyqqa jiberiledi. Úsh jyl boldy. Pandemıa kezinde qyzymnyń qazaqstandyq sheteldik tólqujatynyń qoldaný merzimi aıaqtaldy, konsýldyq ony uzartpaıdy. Qyzyma balasyn tastap, Qazaqstanǵa baryp, jańa tólqujat alyp, qaıtýdy usyndy. Qandaı ana balasyn tastap ketedi? Qazir áskerı is-qımyldar bolyp jatsa da, oǵan kómektesýden bas tartyldy», - dedi áıel.
Tatánanyń qyzy Olga Ragozınanyń aıtýynsha, ol birneshe ret konsýldyqtan kómek suraǵan, alaıda olar máseleni sheshe almaıtynyn aıtqan.
Qazaqstannyń Ýkraınadaǵy elshiligi byltyr 21 qarashada Olga Kıevtiń ortalyq AHAJ arqyly týý týraly kýálikti rásimdeýge nemese Qazaqstanda tólqujatyn jańartýǵa múmkindik alǵanyn habarlady. Bul eki usynysty da elemegenin aıtty.
«Biz kýálikti óz betimizshe rásimdeı almadyq. Tipti Ádilet mınıstrligimen keńestik, óıtkeni onyń tólqujatynyń merzimi ótken, nekede de joq», - dedi elshilik ókilderi.