Almaty qalasynda er adamdar áıelder merekesine arnap qyzǵaldaq, raýshan jáne baqyt gúlin kóptep alady
Naýqan kezinde olardyń baǵasy 800-900 teńgeden bastalady. Kásipkerler gúl saýdasynyń 9 naýryzǵa deıin toqtamaıtynyn aıtady. Odan keıin adamdar legi azaıyp, baǵa da tómendeıdi, dep habarlaıdy Almaty-akshamy.kz 31 arnanyń «Informbúro» baǵdarlamasyna silteme jasap.
«Kóptegen uıym aldyn ala tapsyrys beredi. Keıde keshke deıin tapsyrys berip jatady. Shyny kerek, 3 ret bardym. Endi keshki ýaqytqa arnap taǵy da gúlder ákelýge týra keledi. Artyǵymen alyp jatyrmyz. Sonyń ózinde qazir kóptegen usynys túsip jatyr», – dedi kásipker Jasulan Dúısekenov.
Al Tarazda er azamattar kóbine 8 naýryz merekesine arnap súıiktilerine ártúrli kólemdegi taba pen tabaq alyp jatyr. Menedjerlerdiń aıtýynsha, dál qazir ydys-aıaqtarǵa degen suranys artqan. Ony kóbine orta jastaǵy azamattar alyp jatyr. Sondaı-aq, orta jastaǵy er azamattar gaz peshi, tońazytqysh sekildi turmystyq tehnıkalardy tańdaýda. Al jastar negizinen smartfon tańdaýda.
«Jastar men úlken kisiler analary men juptaryna arnap alyp jatyr. Negizinen «aıfon», «samsýng» jáne qulaqqaptar tańdaıdy», – dedi satýshy Jánibek Júnisbekov.
Munymen qatar, er adamdardyń súıiktilerine altyn syılaǵandy unatatyny belgili boldy. Sol sebepti 8 naýryz qarsańynda altyn buıymdarǵa suranys artqan.
«Áıelder gaýhar tasyn jaqsy kóredi. Al erler óz kezeginde súıiktileriniń kóńilinen shyqqysy keledi. Olardyń baǵasy 200 myńnan bastalyp 1 mıllıon teńgege deıin barady. Keıbir er azamattar áriptesterine sertıfıkat syılaıdy», – dedi satýshy Elena.