Qazir bul qulpynaı satylymda joq
AQSH pen Kanadada vırýs juqtyrǵan organıkalyq qulpynaıdyń kesirinen A gepatıtiniń órshý faktisi tirkeldi. Jemistiń bul túri atalǵan elderde 5 naýryz ben 25 sáýir aralyǵynda satylǵany belgili boldy, dep habarlaıdy Almaty-akshamy.kz QazAqparat-qa silteme jasap.
«Al Jazeera» telekompanıasynyń málimetinshe, AQSH-tyń azyq-túlik pen dári-dármekti baqylaý basqarmasy vırýs juqtyrǵan jemisterdiń «FreshKampo» saýda markasymen búkil el aýmaǵynda satylǵanyn aıtyp otyr. Saldarynan «A» gepatıtin juqtyrýdyń 17 faktisi tirkelip, 12 adam aýrýhanaǵa túsken. Al Kanadada 10 jaǵdaı tirkelip otyr. Onyń tórteýi Albertede, altaýy Saskachevanda tirkelgen. AQSH-ta tirkelgen jaǵdaılardyń keminde 15-i Kalıfornıa shtatyna tıesili. Tamaq ónimderi men dári-dármektiń sapasyn sanıtarlyq qadaǵalý basqarmasynyń málimeti boıynsha, vırýs juqtyrǵan qulpynaı Trader Joe's pen Walmart sıaqty keminde 9 saýda jelisi arqyly satylǵan. Kanadanyń Qoǵamdyq densaýlyq saqtaý agenttigi (PHAC) bul jemisterdiń 5-9 naýryz aralyǵynda satylǵanyn málimdep otyr. Qazir satylymda joq.
«Qulpynaıdy jastaı satyp alyp, tońazytyp saqtap, keıin tutynýǵa bolmaıdy. Jas kúıinde jelinbegen qulpynaıdy salqyn jerde saqtaǵannyń ózinde jemeı, tastaý kerek»», - deıdi sanıtarlyq baqylaý basqarmasynyń mamandary.
A gepatıti – baýyrdy qabyndyratyn juqpaly aýrý. Bul aýrý sanıtarlyq jaǵdaı nashar bolǵan jerde nemese gıgıenalyq tazalyq saqtalmaǵan jaǵdaıda týyndaıdy. Dúnıejúzilik densaýlyq saqtaý uıymynyń baǵalaýy boıynsha, 2016 jyly gepatıttiń bul túrinen 7 134 adam kóz jumǵan. Gepatıttiń ózge túrlerinen bir aıyrmashylyǵy – sozylmaly aýrýlarǵa sebepker bolmaıdy.