AQSH-ta el azamattary kelesi prezıdentin tańdaıtyn saılaý bastaldy.
Búkil álem bul úderisti muqıat baqylap otyr, óıtkeni saılaý qorytyndylary halyqaralyq arenadaǵy kúshti ornalastyrýdy ózgertýi múmkin, dep habarlaıdy aqshamnews.kz.
El boıynsha saılaý ýchaskeleri 5 qarashada ártúrli ýaqytta ashylady.
Vermont daýys berýdi jergilikti ýaqyt boıynsha tańǵy saǵat 5-te bastaıtyn alǵashqy shtat bolady jáne ol 19:00-ge deıin jalǵasady. Odan keıin tańǵy saǵat 6:00-de Konnektıkýt, Kentýkkı, Men, Nú-Djersı, Nú-Iork jáne Vırdjınıa shtattarynda saılaý ýchaskeleri ashylady. Soltústik Karolına, Ogaıo jáne Batys Vırdjınıa shtattarynda saılaý prosesi tańǵy 6:30-da bastalady. 37 shtatta jáne Kolýmbıa okrýginde saılaý tańǵy 7:00 men 10:00 aralyǵynda bastalady. Vashıngton shtaty men Aláska turǵyndary saǵat 11:00-den, Gavaı halqy saǵat 12:00-den daýys bere bastaıdy.
Amerıkalyq saılaýshylar prezıdenttikke alty úmitkerdiń birine daýys beredi. Olar Kamala Harrıs (vıse-prezıdent, Demokratıalyq partıa), Donald Tramp (burynǵy prezıdent, Respýblıkalyq partıa), Kornel Ýest (fılosofıa profesory, jazýshy, din mamany, hrıstıan sosıalısi, táýelsiz kandıdat), Djıll Staın (dáriger, Jasyldar partıasy), Cheız Olıver (belsendi, Lıbertarıandyq partıa) jáne Klaýdıa De la Krýz (qoǵamdyq belsendi, shirkeý pastory, Sosıalızm jáne azattyq partıasy).
AQSH-tyń barlyq azamattary daýys berý úshin osy jyldyń 15 qazanyna deıin tirkelýi tıis bolǵan. Daýys berýge tirkelý úshin AQSH azamaty jáne daýys beretin shtattyń turaqty turǵyny bolýy tıis. Saılaýshy kem degende 18 jasta, aqyl-oıy saý jáne basqa shtatta daýys berý úshin tirkelmegen bolýy shart.
Daýys berý búletenderi aǵymdaǵy jyldyń 16 qazanynan bastap 22 qazanǵa deıin poshta arqyly jiberildi jáne 5 qarashada saǵat 20.00-den keshiktirilmeı jaramdy poshta shtempeli japsyrylyp poshta arqyly qaıtarylýy nemese saılaý kúni daýys berý jáshigine tastalýy tıis.
Elde daýys berý barysyn júzdegen halyqaralyq baqylaýshy qadaǵalap otyr.