Djo Baıdenniń densaýlyǵynda kinárat joq.
AQSH Prezıdenti Djo Baıdenniń densaýlyq jaǵdaıy jaqsy jáne óz mindetterin júıeli oryndaý úshin barlyq kúsh-jigeri jetkilikti, dep habarlaıdy Almaty-akshamy.kz QazAqparatqa silteme jasap.
Beısenbi kúni dárigerler Vashıngton aýrýhanasynda AQSH-tyń 80 jastaǵy basshysyn tolyq medısınalyq tekseristen ótkizdi. Bul - Djo Baıdenniń prezıdenttik qyzmetke kiriskennen bergi ekinshi tekserisi.
Medısınalyq tekseris AQSH prezıdentiniń burynǵy aýrýlaryn anyqtaý men qazirgi densaýlyq jaǵdaıyn baqylaý maqsatynda júrgizilgen.
«Óziniń tolyq qyzmettik mindetterin oryndaýǵa Prezıdenttiń kúsh-jigeri jetkilikti», - dep jazdy Aq úı dárigeri Kevın O'Konnor óziniń qyzmettik jazbasynda.
Qujatqa sáıkes, Djo Baıden qazirgi ýaqytta júrektiń turaqsyz soǵýy, joǵary holesterın, epızodtyq qyshqyl reflúksi, maýsymdyq alergıa, omyrtqa artrıti jáne aıaq býyndaryndaǵy nervtik júıelerdiń zaqymdanýy dertteri boıynsha em qabyldap jatyr. Degenmen onyń jaǵdaıy turaqty.
Medısınalyq tekserý kezinde Djo Baıdenniń ınsýlt nemese Parkınson sıaqty nevrologıalyq aýrýlarmen aýyratynyn anyqtaý maqsatynda kúrdeli zertteý júrgizilgen. Nátıjesinde dárigerler AQSH prezıdentiniń atalǵan derttermen aýyrmaıtynyn rastady.
Sońǵy saılaý kezinde Djo Baıden saıası qarsylastarynyń aqyl-oı kemshilikteri aýrýymen syrqattanady degen málimdemelerin joqqa shyǵaryp, kognıtıvti testten bas tartqan bolatyn.