Qazaq mádenıetimen, ábedıetimen tanysam degen amerıkalaryqtar úshin AQSH astanasynda Abaı ortalyǵy jumys istep tur.
Djordj Vashıngton ýnıversıteti janynan qurylǵan ortalyq 2019 jyldyń basynda ashyldy. Pandemıa kedergi keltirgenimen, ortalyq qazir tolyqqandy jumys istep tur, dep habarlaıdy Almaty-akshamy.kz 24.kz-ke silteme jasap.
Qazaq mádenıetin bilgisi kelgen shet eldik stýdentterge Abaı ortalyǵy taptyrmas jer. Qazaqstanǵa qatysty aǵylshyn tilinde jaryq kórgen zertteýler men antalogıalardy paıdalana alady. Klasık jazýshylardyń shyǵarmalaryn da oqýǵa bolady. Kezinde Erjan Qazyhanovtyń qoldaýymen ashylǵan ortalyq pandemıadan soń jumysyn qaıta jandandyrdy.
«Biz Abaı ortalyǵy arqyly tek tarıhı jádigerlerdi kórsetip, mádenı jetistikterimizdi qana tanytýdy josparlap otyrǵan joqpyz. Sonymen qatar qazirgi Qazaqstan mádenıetindegi jańalyqtardy da jetkizgimiz keledi. Sondyqtan ortalyqtyń jumysyn shıratýǵa qatysty úlken josparlarymyz bar. Elimiz týraly aqparatty aǵylshyn tilinde taratý tek Amerıkada ǵana emes, búkil álemde Qazaqstanǵa degen qyzyǵýshylyq artady dep sanaımyz», - dedi Eýropa, Reseı jáne Eýrazıalyq zertteýler ınstıtýtynyń qyzmetkeri Aıtolqyn Qurmanova.
Ortalyqtyń saıtynda qazaq tarıhy men mádenıetine qatysty ǵylymı maqalalar men batys ǵalymdarynyń qundy zertteýleri bar. Ulttyq mýzykalyq aspaptarǵa qatysty podtkastardy da osy jerden tyńdap, Abaı murajaıyna 3D formatta onlaın saıahat jasaýǵa bolady. Ortalyq Djordj Vashıngton ýnıversıtetindegi Evropa, Reseı jáne Eýrazıa zertteý ınstıtýty janynan qurylǵan. Instıtýt dırektorynyń sózinshe, Qazaqstandy tanyp bilýge degen qyzyǵýshylyq stýdentter arasynda joǵary.
«Mádenıet kez kelgen eldiń qýaty, kúshi. Ony jaqsy bilmeı syrtqy saıasatyn zertteý, túsiný jáne halyqaralyq baılanys ornatý múmkin emes. Abaı ortalyǵy qazaq tarıhyn, mádenıetin, mýzykasyn, ádebıetin keńirek aýdıtorıaǵa pash etýdiń múmkindigi dep bilemiz. Jalpy, qazaq mádenıetin tek zertteýshilerge ǵana emes qarapaıym amerıkalyqtarǵa tanytý úshin kóptegen sharalardy ótkizý josparda», - deıdi WJ ýnıversıteti, Evropa, Reseı jáne Eýrazıa zertteý ınstıtýtynyń dırektory Marlen Larúel.
Eki jylda ortalyq birqatar sharalardy júzege asyrdy. Máselen, Garvard ýnıversıtetinde Abaı sımpozıýmy ótip, muralary kópshilikke tanystyryldy. Taıaýda Muhtar Áýezovtiń 125 jyldyq mereıtoıyna oraı halyqaralyq onlaın ǵylymı konferensıa ótti. Mundaı mádenı sharalar shıraı túspek.