SQO-da muz qursaýynda qalǵan aqqý qutqaryldy
Soltústik Qazaqstan oblysyndaǵy kólde qalyp qoıǵan eki aqqýdyń birin qutqarýshylar muz qursaýynan bosatty, dep habarlaıdy almaty-akshamy.kz QazAqparatqa silteme jasap.
Petropavl mańyndaǵy tuzdy kólde eki aqqýdyń qalyp qoıǵandyǵy týraly qutqarýshylarǵa turǵyndar habarlaǵan. Alty mamannan turatyn qutqarý toby oqıǵa ornyna bardy.
«Qazir kóldiń betine shyǵý asa qaýipti. Ádette muzdyń qatqanyn kútemiz. Qazir onyń qalyńdyǵy nebary 6 sm ǵana. Kez-kelgen ýaqytta oıylyp ketýi múmkin. Arnaıy shanamyz bar. Ekeýimiz muz betine shyqsaq, eki qutqarýshy jaqyn jerde kómek berýge daıyn turady. Mundaı operasıa keıde birneshe saǵatqa sozylýy múmkin», - deıdi qutqarý bóliminiń bas qutqarýshysy Danıar Bádilov.
Qutqarýshylar muz qursaýyna qalǵan eki aqqýdyń bireýin ǵana ustap aldy. Ekinshisi ushyp ketip, qamys arasyna jasyryndy.
«Jylda osy ýaqytta jyly jaqqa usha almaı qalǵan jabaıy qustardy qutqaramyz. Byltyr 11 aqqýdy muzdan alyp shyqtyq. 2017 jyly 16 qusty qutqarǵan edik. Ádette kesh ósken, durys jetilip, qanaty qataıyp úlgermegen balapan qustar qalyp qoıady. Qazir biz bul aqqýdy halyq arasynda «jyly kanal» dep atalyp ketken sý qoımasyna aparamyz. Jylý-elektr ortalyǵynan aǵyp jatqan tehnıkalyq sý qys boıy qatpaıdy. Qustyń qystap shyǵýyna qolaıly. Al biz ony óz baqylaýymyzǵa alamyz», - deıdi SQO orman sharýashylyǵy jáne janýarlar álemi aýmaqtyq ınspeksıasynyń bólim basshysy Oleg Bespalov.
Mamannyń aıtýynsha, óńirge jazda 4 myńnan astam aqqý keledi. Tabıǵatty qorǵaýshylar qys túskenge deıin sý qoımalaryn baqylaýǵa alyp, tobynan qoıǵan qustardy qamqorlyqqa alady.