Aqmola oblysynda “Brakoner” operasıasy qorytyndylandy, dep habarlaıdy almaty-akshamy.kz Polisia.kz silteme jasap.
Tabıǵatty qorǵaý zańnamasy salasyndaǵy ákimshilik quqyq buzýshylyqtar men qylmystardyń aldyn alý jáne anyqtaý, brakonerlik faktileriniń jolyn kesý maqsatynda 3-9 tamyz aralyǵynda Aqmola oblysynyń aýmaǵynda “Brakoner” jedel aldyn alý is-sharasy ótkizildi. Zerendi aýdanyndaǵy Myrzakólsor kólinde ótken reıdtik is-shara barysynda polıseıler Kókshetaý qalasy men Soltústik Qazaqstan oblysynyń Taıynsha qalasynyń turǵyndaryn ustady.
Brakonerlerden 80 kılogramm tuqy balyǵy jáne sıntetıkalyq monofılamentten jasalǵan jalpy uzyndyǵy 420 metr bolatyn alty tor tárkilendi. Esterińizge sala keteıik, Qazaqstan Respýblıkasy aýmaǵynda qoldanystaǵy balyq aýlaý erejelerine sáıkes “qytaı” jelilerin, ıaǵnı sıntetıkalyq monofılament jelilerin paıdalana otyryp, balyq aýlaýǵa jol berilmeıdi.
Qazirgi ýaqytta atalǵan fakti boıynsha QR ÁQBtK 383-babynyń 3-bóligi (Balyq aýlaý jáne balyq resýrstary men basqa da sý janýarlaryn qorǵaý erejelerin buzý) boıynsha ákimshilik hattama toltyryldy. Jalpy, “Brakoner” operasıasynyń jeti kúninde 228 ákimshilik quqyq buzýshylyq jáne bir qylmystyq teris qylyq anyqtaldy. Onyń ishinde QR ÁQBtK 382-baby boıynsha zańsyz ań aýlaý erejelerin buzǵany úshin 144 quqyq buzýshy ákimshilik jaýapkershilikke tartyldy. Sonymen qatar QR ÁQBtK 383-baby boıynsha sý janýarlaryn zańsyz aýlaǵany jáne balyq aýlaý erejelerin buzǵany úshin 76 ákimshilik materıal jasaldy.
QR ÁQBtK- 381-1-baby (Aǵashtar men butalardy zańsyz kesý, joıý nemese búldirý) boıynsha segiz quqyq buzýshylyq anyqtaldy, sondaı-aq erekshe qorǵalatyn tabıǵı aýmaqta zańsyz ań aýlaǵany úshin QK 337-baby boıynsha qylmystyq is qozǵaldy.