Dástúrge aınalǵan «Úzdik pedagog» konkýrsynyń aýdandyq kezeńi aıaqtalyp, №206 mektep-gımnazıanyń fızıka páni muǵalimi Aqmaral Nıazbekova birinshi oryndy ıelenip, Naýryzbaı aýdanynyń «Úzdik pedagogy» atandy.
Jas ta bolsa mol tájirıbesi bar ustazdyń bilim salasyndaǵy jumys ótili 23 jyldy quraıdy. Osynaý jyldar ishinde Aqmaral Qaltaıqyzy óziniń izdenimpazdyǵymen, eńbeksúıgishtigimen talaı belesti baǵyndyrdy.
Ór Altaıdyń tabıǵatynan nár alyp, shyńdalyp ósken Aqmaral Qaltaıqyzy arman qýyp alys jolǵa shyǵady. Ustaz bolsam degen armany aldamady. Ómirde jaqsy jandarǵa jolyqty. Qıyn da, qyzyqty mamandyqtyń maıtalman mamanyna aınaldy.
Aqmaral Nıazbekova eńbek jolyn 2001 jyly Almaty qalasynyń Bostandyq aýdanyndaǵy №138 gımnazıada fızıka pániniń muǵalimi bolyp bastaıdy. Keıin Jetisý aýdanyndaǵy №148 mektep-gımnazıasynda jumys istep, qazirgi ýaqytta №206 mektep-gımnazıasynda óz qyzmetin jalǵastyryp jatyr. Bilikti ustaz qajyrly eńbegi men kásibı sheberliginiń arqasynda kóptegen jetistikterge qol jetkizdi. Óz salasynyń qyry men syryn meńgerip, naǵyz mamanǵa aınaldy. Uzaq jylǵy tájirıbe men tynymsyz eńbek ony talaı bıikke shyǵardy. Ustazdyń izdenisi talaı baıraqty báıgelerge jol ashty.
İzdenimpaz ustazdyń qatysqan baıqaýlary óte kóp. Olardyń qatarynda «Daryn» respýblıkalyq praktıkalyq ortalyǵy uıymdastyrǵan «Úzdik avtorlyq baǵdarlama», «Digital Ustaz Almaty 2021» sıfrlyq orta qurý baıqaýy, «Úzdik pedagog», «Pedagogıkalyq ıdeıalar» sıaqty baıqaýlar bar. Bilikti ustazdyń osy saladaǵy eńbegi eskerýsiz qalǵan joq.
Ol «Qazaqstan Respýblıkasynyń qurmetti pedagogy» tósbelgisiniń ıegeri atandy, birneshe márte qalalyq Bilim basqarmasynan «Alǵys hattar» aldy. Esimi «Bilim berý salasyndaǵy úzdik esimder» atty úzdik pedagogtar antologıasyna endi. Árıne, ustazdyń eńbegi shákirtteriniń jetistikterimen de ólshenedi. Aqmaral ustazdyń oqýshylary Prezıdenttik olımpıada, qalalyq, respýblıkalyq jáne «Daryn» ortalyǵy uıymdastyrǵan pándik olımpıadalarda fızıka páni boıynsha júldeli oryndarǵa ıe bolyp keledi.
Biz biletin Aqmaral Qaltaıqyzynyń ınovasıalyq beınesi onyń shákirtteriniń bilimdik jáne zertteýshilik jetistikteriniń joǵary nátıjelerimen erekshelenedi. Ol – oqýshylardyń ǵylymı zertteýlerine jetekshilik etý arqyly óziniń shyǵarmashyl ári izdenimpaz pedagog degen ımıjin qalyptastyrǵan sheber ustaz.
– Osynaý jyldar ishinde ózim tańdaǵan mamandyqtyń naǵyz mamany bolǵanyma qýanamyn. «Ustaz bolý – batyldyqtyń belgisi» deıdi ǵoı. Bul shyndyq emes pe? Men búgin ózim armandap, tańdaǵan mamandyqtyń ıesi atandym. Shákirtterim de bergen bilimimdi aqtap, jaqsy nátıjelerge qol jetkizip jatyr. Áli de bilimniń bıigine umtylsam deımin, – deıdi Aqmaral Qaltaıqyzy.
Onyń alar asýy men shyǵar bıigi áli alda.