Bankır bolyp, polıseı bolyp, jurtty aldap bolǵan alaıaqtar endi medık retinde tóbe kórsete bastapty.
Mundaı faktiler baryn «Memlekettik tehnıkalyq qyzmet» AQ mamandary rastap otyr, dep habarlaıdy aqshamnews.kz
Sizge klınıkanyń tirkeý bóliminen dep qońyraý shalady. Olar sizdiń úıińizdiń adresine deıin bilip turady. Sosyn: «Endi dárigerdiń qabyldaýy men jedel járdem shaqyrý — JSN (IIN) boıynsha emes, medısınalyq deklarasıa nómiri arqyly júrgiziledi. Sizge qazir «deklarasıa nómiri» kelýi kerek, sony aıtyńyz, bir tirkep qoıamyz...»
Al, is júzinde ol — DamuMed nemese eGov sıaqty memlekettik ótinimderdi engizýge arnalǵan bir rettik kod. SMS túrinde kelgen 6 tańbaly kodty aıtyp bergen adam alaıaqtarǵa jeke kabınetin ashyp beredi.
Sondyqtan, telefonmen ózin kim dep tanystyrsa da, SMS-kodty eshkimge bermeý kerek. JSN surasa, aıtpaǵan durys. Saq bolarsyz.