Almatydaǵy ekomádenıet: qalada «Taza Qazaqstan» tujyrymdamasyn júzege asyrý boıynsha İs-qımyl jospary qabyldandy
Almatyda qala máslıhatynyń kezekten tys XXIX sesıasynda 2025–2029 jyldarǵa arnalǵan «Taza Qazaqstan» tujyrymdamasyn júzege asyrý boıynsha İs-qımyl jospary bekitildi. Bul qujatty Memleket basshysynyń eldegi ekologıalyq jaǵdaıdy jaqsartý jónindegi tapsyrmasyn oryndaý aıasynda qalayń Ekologıa jáne qorshaǵan ortany qorǵaý basqarmasy ázirlegen.
Jospar 2024 jyly qazanda Qazaqstan Respýblıkasy Úkimeti bekitken «Taza Qazaqstan» tujyrymdamasyna negizdelgen. Onyń basty maqsaty – Almatyda balabaqsha men mektepten bastap, korporatıvtik keńse men qalalyq qaýymdastyqqa deıingi shynaıy ekologıalyq mádenıetti qalyptastyrý.
Jospar úsh negizgi baǵytty qamtıdy: turǵyndar arasynda ekologıalyq oılaýdy damytý, ekologıalyq aǵartýshylyqty ilgeriletý jáne ekologıalyq bilim berý júıesin keńeıtý. Qujat aıasynda aýa sapasyn avtomatty baqylaý júıelerin ornatý, qaldyqtardy qaıta óńdeý ınfraqurylymyn damytý, ekoeriktilikti qoldaý, sondaı-aq, «Jasyl mektep» jáne «Jasyl keńse» jobalaryn engizý sharalary kózdelgen.
Aıta keteıik, qabyldanǵan Jospar bekitilgen sátten bastap kúshine enedi jáne aldaǵy jyldary Almatyda ekologıalyq mádenıetti damytý boıynsha júıeli jumystyń negizi bolady.
Esterińizge sala keteıik, «Taza Qazaqstan» respýblıkalyq aksıasy Prezıdent Qasym-Jomart Toqaevtyń tapsyrmasymen eldi mekenderdiń aýmaǵyn kórkeıtý jáne kógaldandyrý maqsatynda iske asyrylýda jáne halyq arasynda qorshaǵan ortaǵa uqypty qaraý qundylyqtaryn qalyptastyrýǵa, joǵary azamattyq jaýapkershilik pen ekologıalyq mádenıetti tárbıeleýge baǵyttalǵan.
Almatyda osy aksıa aıasynda ekinshi jyl qatarynan «Almaty – ortaq úıimiz» atty ekologıalyq naýqan ótkizilýde. Qalanyń turǵyndary tazalaý, qalany kórkeıtý jáne kógaldandyrý jumystaryna belsendi qatysýda. Bıyl ekonaýqan 1 naýryz ben 1 sáýir aralyǵynda ótti, onyń barysynda 4 myńnan astam aýla aýmaqtary, 445 qala saıabaǵy pen skverler, 2 myńnan astam kóshe tazartyldy, 600-den astam zańsyz saýda nysany alynyp tastaldy, 3 myńnan astam kóshedegi qoqys jáshigi ornatyldy, sondaı-aq, 20 myńǵa jýyq aǵash pen buta otyrǵyzyldy.
Buǵan qosa, «Almaty – ortaq úıimiz» naýqany aıasynda ártúrli baıqaýlar men bastamalar uıymdastyryldy. Olardyń ishinde: «Taza aýa» aksıasy, «Qorshaýyńdy boıa», «Jaqynyńa járdemdes», «Merzimi ótken dárilerdi tapsyryp, tabıǵatty saqta» aksıalary, «Úzdik komýnaldyq qyzmetker» baıqaýy, sondaı-aq, 50 myńnan astam adam qatysqan jáne 8 myń tekshe metrden astam qoqys jınalyp, shyǵarylǵan Almaty Clean & Green jalpyqalalyq senbiligi bar.