Almatydaǵy Turan ýnıversıtetinde KSRO halyq artısi, QR Eńbek Eri, teatr jáne kınonyń uly tulǵasy Asanáli Áshimovpen taǵylymdy kezdesý ótti.
Bul basqosý qazaq óneriniń abyzy Asanáli Áshimulynyń «Aktermyn men, myń ólip, myń tirilgen» atty kitabynyń tusaýkeserine arnaldy.
Jıynǵa Qazaqstan Jazýshylar odaǵy basqarmasynyń tóraǵasy Mereke Qulkenov, Turan ýnıversıtetiniń rektory, profesor Rahman Alshanov, QR Eńbek sińirgen qaıratkeri, aqyn Aqushtap Baqtygereeva, Almaty qalasy Mádenıet basqarmasynyń bólim basshysy Arman Qalybekov, QR BǴM ǴK M.Áýezov atyndaǵy Ádebıet jáne óner ınstıtýtynyń dırektory Kenjehan Matyjanov, «Alatau Aqparat» medıaholdınginiń bas dırektory Erjan Qalymbaıuly, saıasattanýshy Ámirjan Qosanov, Almaty qalasy ákiminiń keńesshisi, ádebıet zertteýshi ǵalym, fılologıa ǵylymynyń kandıdaty Mamaı Ahetov, teatr jáne kıno akteri Azamat Satybaldy jáne zıaly qaýym ókilderi, qoǵam belsendileri men stýdentter qatysty.
Keshtiń moderatory – jýrnalısıka salasynyń maıtalmany Qalı Sársenbaı boldy.
Kezdesý emen-jarqyn syrlasýǵa, estelikter men taǵylymdy áńgimege, stýdentterdiń kókeıdegi suraqtaryna jaýap berýge ulasty.
Aqyn Aqushtap Baqtygereeva:
– Asanáli aǵamyz qazaqtyń birtýar dara tulǵasy. Bul kisi nebir taǵdyrly kezderdi bastan ótkerdi. Óziniń aqyly, qaıraty, jigeri arqasynda búgingi bıigine jetip, eldiń abyz aqsaqalyna aınalyp otyr. Mundaı alyp tulǵamen júzdesip, tildesý – zor baqyt. Jastar ónege alyp, úlgi etetin dara tulǵa dep bilemin, – dedi.
Qazaqstan Jazýshylar odaǵynyń tóraǵasy Mereke Qulkenov te aǵamyz týraly júrekjardy estelikterin bólisti:
– Asanáli Áshimov aǵamyzdyń ónerin el jaqsy biledi. Halyqqa «Qyz Jibek», «Atamannyń aqyry» atty tarıhı-kórkem fılmderimen tanyldy. Qazaq KSR men KSRO halyq ártisi ataǵyn alý ońaı sharýa emes. Onyń kitabynda jazylǵan áńgimelerdiń keıbirin buryn da estip júrdik. Bul eńbegi – oqyrmanǵa úlgi hám ónege, – dedi ol.
Kesh barysynda Asanáli Áshimuly ózi de sóz sóılep, kitabynyń mán-mańyzyna toqtaldy. Stýdentterdiń suraqtaryna jaýap berip, úzdik suraq qoıǵan jastarǵa qoltańbasyn qoıyp, kitabyn syıǵa tartty.
Jıyn sońynda qazaq óneriniń abyzy jastarǵa aq batasyn berip, alǵysyn jetkizdi.