Almatyda qala ákimi Darhan Satybaldynyń tóraǵalyǵymen Ákimdik janyndaǵy Ǵylym jáne tehnologıalar keńesiniń alǵashqy otyrysy ótti. Jıynǵa ǵylymı qaýymdastyq ókilderi, joǵary oqý oryndarynyń basshylary jáne jas ǵalymdar qatysty. Keńes Memleket basshysynyń tapsyrmasy boıynsha óńirde ınovasıalyq ekojúıeni damytý maqsatynda quryldy.
Darhan Satybaldy Qasym-Jomart Toqaevtyń Joldaýynda aıqyndalǵan mindetterdiń ózektiligin atap ótti. Atap aıtqanda, ekonomıkany ártaraptandyrý, jańa salalardy damytý jáne ǵylym men tehnologıa úshin qolaıly orta qalyptastyrýdyń mańyzdylyǵyna toqtaldy.
«Jahandyq ózgerister jaǵdaıynda Almatynyń básekege qabilettiligin arttyryp, onyń áleýetin barynsha tıimdi paıdalaný qajet», – dedi Darhan Satybaldy.
Jıynda jasandy ıntellekt taqyrybyna aıryqsha nazar aýdaryldy. El Prezıdenti arnaıy mınıstrlik qurý jáne AI tehnologıalaryn ekonomıkanyń barlyq salasyna keńinen engizý qajettigin atap ótken bolatyn. Darhan Satybaldynyń aıtýynsha, bul bastama Almaty úshin strategıalyq mańyzǵa ıe. Eldegi 254 ınovasıalyq kompanıanyń 52-si osynda ornalasqandyqtan da qala - elimizdiń jetekshi IT-haby sanalady. «Bul Almatynyń jańa tehnologıalardy engizý men synaqtan ótkizý áleýetiniń joǵary ekenin dáleldeıdi», – dedi qala ákimi.
Sondaı-aq, sıfrlyq tehnologıalardyń ekonomıkany jańǵyrtýǵa, memlekettik qyzmetterdiń tıimdiligin arttyrýǵa, densaýlyq saqtaý men bilim berý salalaryn damytýǵa zor múmkindik ashatyny ataldy.
Mańyzdy baǵyttardyń biri – kadr daıarlaý. Ákimniń aıtýynsha, tehnıkalyq jáne kásiptik bilim berý júıesin jańǵyrtý oqý baǵdarlamalaryn óndiristiń naqty suranystaryna sáıkestendirýge jol ashady. Al ǵylymdy komersıalandyrý «eńbek ónimdiligin arttyrýǵa jáne ınvestısıa tartýǵa múmkindik beredi».
Almatydaǵy ǵylymı qyzmettiń negizgi baǵyttary retinde ekologıa, seısmıka, zıatkerlik áleýet, ınfraqurylym jáne kóshi-qon úderisteri aıqyndaldy.
«Qalada jaıly ári qaýipsiz orta qalyptastyrý úshin jergilikti ǵylymı ınstıtýttar men ǵalymdardyń qoldanbaly zertteýleri men ıdeıalaryn belsendi túrde engizý mańyzdy», – dep atap ótti Darhan Satybaldy.
Jıyn bul máselelerdi júıeli túrde zerttep, ınovasıalyq sheshimder ázirleýdi kózdeı otyryp, álemdik ozyq tájirıbeler men otandyq startaptarǵa súıenedi.
«Almaty basqa qalalarǵa úlgi bolyp, jańa ıdeıalar men úzdik tájirıbelerdiń qaınar kózine aınalýy tıis», – dep túıindedi qala ákimi.