Aıyppul tóleısiń!
Ánuranǵa laıyqty qurmet kórsetpegen atyraýlyq áskerı qyzmetshige 172 500 teńge aıyppul salyndy, dep habarlaıdy Almaty-akshamy.kz
AtyrauPress portalynyń málimeti boıynsha, Maqat aýdanynda ótken sporttyq shara kezinde Ánuran oryndalǵanda áskerı qyzmetshilerdiń bireýi oń qolynyń eki saýsaǵyn ǵana keýde tusyna qoıyp turǵany vıdeoǵa jazylyp qalǵan. Osydan keıin memlekettik rámizderdi nasıhattaý ulttyq ortalyǵy oblystyq ishki saıasat pen aýdan ákiminine shaǵym túsirip, Ánuranǵa laıyqty qurmet kórsetpegen áskerı qyzmetshini jaýapqa tartýdy talap etken.
Jergilikti polısıa basqarmasynyń bastyǵy Erlan Bıǵambaevtyń aıtýynsha, aryz "E-Ótinish" portaly arqyly tirkelgen. Odan keıin polısıa bóliminiń qaraýyna tústi.
"Kináli adam anyqtaldy, oǵan zań boıynsha ákimshilik aıyppul salyndy", - deıdi Bıǵambaev.
Ákimshilik quqyq buzýshylyq kodeksiniń 458-baby, 1-tarmaǵy (Qazaqstan Respýblıkasynyń Memlekettik Gımnin Qazaqstan Respýblıkasy zańnamasynyń talaptaryn buza otyryp paıdalaný jáne oryndaý) boıynsha hattama rásimdeldi. Oǵan sáıkes, áskerı qyzmetshige 50 AEK (172 500 teńge) kóleminde aıyppul salyndy. Bir aptanyń ishinde aıyppuldyń jartysyn ǵana tóleýge bolady.