Áleýmettik jelide tártipsizdikterge qatysqan belsendilerdiń óz jaǵyna shyǵýǵa úgittegenimen, Ulttyq ulan qyzmetshisiniń oǵan kónbeı, mindetin atqara bergendigi týraly beınejazba tarap ketken. Jurtty tánti etken bul áskerı - QR Ulttyq ulany «Batys» óńirlik qolbasshylyǵy 6655-áskerı bóliminde leıtenant Ulan Myrzabaı, dep habarlaıdy Almaty-akshamy.kz QazAqparatqa silteme jasap.
«Batys» óńirlik qolbasshylyǵy baspasóz qyzmetiniń jetekshisi, podpolkovnık Erbolat Sultanov málim etkendeı, U.Myrzabaıǵa qatysty oqıǵa Aqtóbe qalasynda boldy.
Áleýmettik jelide tarap ketken b eınejazbany 190 myńǵa jýyq adam qarap, 700-deıi áskerı qyzmetshini qoldap, pikir jazǵan.
Anyqtalǵanyndaı, beınejazba 5 qańtar kúni Aqtóbede túsirilgen bolyp shyqty.
Almaty oblysy Qapshaǵaı qalasynyń týmasy Ulan Myrzabaı Ulttyq ulanda 2017 jyldan qyzmet etip keledi eken.
Sol kúni olar zańsyz mıtıńi kezinde Aqtóbe oblysy ákimdigi aldyndaǵy alańda aldyńǵy shepte turǵan.
U.Myrzabaıdyń sózine qaraǵanda, bastapqyda bári tynysh bolǵan. Bular mıtıńige qatysýshylardyń óz talap-tilekterin bildirýine qarsylyq etpegen, qaıta qorǵap turǵan. Alaıda keıbireýleri tártip buza bastaǵan.
«Qoldarynda tas, taıaq, armatýra jáne Molotov kokteıli boldy. Aldyńǵy shepte turǵan maǵan birnesheýi jaqyndap kelip, vıdeoǵa túsirip, meni óz jaqtaryna shyǵýǵa úgittedi. Biraq men buıryqtyń aty buıryq ekendigin aıtyp, áskerı antyma adaldyqtan aınyǵanym joq. Elimiz bizge sendi. Sol senimnen shyǵýdan, Otandy qorǵaýdan artyq abyroı joq», - dedi Ulan Myrzabaı.