Elimizdiń balalary úshin Oqý-aǵartý mınıstrligi aıryqsha tartý jasap, alǵash ret Halyqaralyq balalardy qorǵaý kúninde qazaq tilindegi balalar ánderiniń festıvali bastalǵan edi. Tuńǵysh ret ana tilinde ótip otyrǵan mundaı festıvál bizdiń elimizde joqqa tán. Sonymen qatar, atalmysh festıvál -eń aldymen balalar men jasóspirimderge rýhanı-adamgershilik jáne azamattyq tárbıe berýde tıimdi qural ispetti.
«Ánshýaq» festıvali balalardyń talanttaryn ashýǵa múmkindik berýmen qatar, olardyń boıyna patrıottyq sezimdi darytady. Baıqaý barysynda balalar elimizdiń tarıhı- mádenı qundylyqtaryn da qosa nasıhattaıdy. Sondyqtan osynaý shara «Birtutas tárbıe» baǵdarlamasy aıasynda óskeleń urpaqty tárbıeleýde mańyzdy ról atqara bastaǵanyn da aıta ketýimiz oryndy. Jalpy, biz óskeleń urpaqtyń boıyna tarıhı, rýhanı, mádenı qundylyqtar negizinde adamı qasıetterdi sińirý týraly kóp aıtamyz. Osy baǵytta tárbıeleý «Birtutas tárbıe» baǵdarlamasynyń basty mindetti. Atalmysh festıvál jas patrıottardy tárbıeleýge kómektesetin án merekesi. Sondaı-aq, balalardy kópshilik aldynda erkin sóıleýge de úıretedi. Sonymen, dál qazir elimizde «Ánshýaq-2024» balalar ánderiniń ekinshi respýblıkalyq chellendji bastalyp, oǵan 6-18 jas aralyǵyndaǵy balalar men jasóspirimder qatysa bastady. Mundaǵy basty maqsat-balalar qazaq tilindegi ándi jandy daýysta oryndap, beınejazbasyn #Ánshýaq-2024 heshtegimen TikTok-ta jarıalaýytıis. Qazirdiń ózinde balalar oryndaǵan beınerolıkter 200 myńnan astam qaralym jınap otyr. Máselen, «Ánshýaq» balalar ánderiniń chellendji alǵash ret 2024 jyldyń 1 aqpany men 1 maýsymy aralyǵynda ótip, jeti aı ishinde 12 myńnan astam jarıalanym jáne 12 mıllıonnan astam qaralym jınaǵan bolatyn. Elimizdiń ár óńirinde «Oren Air» formatynda eń tanymal balalar ánderi shyrqalǵan edi.
«Jańa oqý jyly bastalǵaly beri osy ıdeıamen shabyttanǵan 5 myńǵa jýyq mektep oqýshysy chellendjge qosyldy. Olar beınejazbalaryn «Ánshýaq-2024» heshtegimen TikTok-ta jarıalap, ózderi oryndaǵan balalar ánderin «Qazaq radıosyna» joldap jatyr. Aǵymdaǵy jyldyń qyrkúıek aıynan bastap «Qazaq radıosynda» «Ánshýaq radıo-festıvali» aıdary ashyldy. Bul búkil Qazaqstannyń túkpir- túkpirindegi balalardyń basyn biriktiretin shyǵarmashylyq tolqyn. Qatysýshylar tek án oryndap qana qoımaı, sol ánderdiń óz ómirinde alar mańyzy týraly oılarymen de bólisedi», - deıdi «Respýblıkalyq qosymsha bilim berý oqý-ádistemelik ortalyǵynyń» dırektory Raısa Sher.
«Ánshýaq» qazaq tilindegi balalar áni festıvaliniń Gala-konserti 2025 jylǵy 1 maýsymda Astana qalasynda ótkiziledi. Respýblıkalyq qazylar alqasy 2025 jyldyń sáýirinde qazaq tilindegi balalar ánderi oryndaýshylary qatarynan chellendj kezinde
- Tik-Tok áleýmettik jelisinde eń kóp qaralǵan qazaq tilindegi tanymal balalar ánderin, Gala-konsert baǵdarlamasyna qatysatyn eń jaqsy ánderdi anyqtaıdy.
Gala-konserttiń barlyq qatysýshylary dıplomdarmen, baǵaly syılyqtarmen, «Baldáýren» respýblıkalyq oqý-saýyqtyrý ortalyǵyna joldamalarmen marapattalady.