Qazaqstandaǵy bedeýlik neke búkil álemdegi sıaqty, medısınalyq-áleýmettik problema bolyp qala beredi, onyń sheshimi eldegi demografıalyq ahýaldy jaqsartýǵa jáne balaly bolý múmkindiginen aıyrylǵan pasıentterdiń ómir súrý sapasyn arttyrýǵa yqpal etetin bolady.
Qazaqstanda bedeýlikten zardap shegetin pasıentterdiń mindetti medısınalyq saqtandyrý júıesinde ekstrakorporaldyq uryqtandyrý arqyly medısınalyq kómek alý quqyǵy zańnamalyq túrde bekitilgen, dep habarlaıdy Almaty-akshamy.kz Densaýlyq saqtaý mınıstrliginiń baspasóz ortalyǵyna silteme jasap.
Memleket basshysy óziniń halyqqa Joldaýynda Úkimetke 2021 jyldan bastap EKU-ǵa kvotalardy 7 esege arttyra otyryp, «Ańsaǵan sábı» arnaıy baǵdarlamasyn iske qosýdy tapsyrdy.
Prezıdenttiń tapsyrmasyn sapaly iske asyrý maqsatynda Mınıstrlik elimizdiń jetekshi beıindi mamandary qatarynan jumys tobyn qurdy, «Ańsaǵan sábı» arnaıy baǵdarlamasyn bekitti, tıisti NQA ázirledi.
Jalpy alǵanda, fertıldik jastaǵy áıelder men erlerdiń sanyn eskere otyryp, óńirler bólinisinde EKU júrgizýge jyl saıyn 7 000 kvota bólý júrgiziledi.
Áleýmettik medısınalyq saqtandyrý qory (ÁlMSQ) medısınalyq uıymdar bólinisinde EKU qyzmetteriniń kólemin ornalastyrdy. MÁMS sheńberinde memlekettik qyzmetti 19 klınıka (onyń ishinde 3 memlekettik, 16 jeke) usynady.
Sondaı-aq, Mınıstrlik aı saıyn oryndalǵan baǵdarlamalardyń tıimdiligine monıtorıń júrgizedi.
«Ańsaǵan sábı» baǵdarlamasyn iske asyrý bastalǵannan beri 2022-2023 jyldary EKU 19 000-nan astam áıelge júrgizildi, 7 000-nan astam áıel júkti boldy, 3 800 otbasynda 4 500-den astam náreste dúnıege keldi, 2 500 júkti áıel bala týýdy kútýde.
Aǵymdaǵy jyly 2023 jylǵa óńirler bólinisinde barlyq 7 000 kvota bólindi.
Sonymen qatar, «Ańsaǵan sábı» baǵdarlamasynyń is-sharalary «Deni saý ult» árbir azamat úshin sapaly jáne qoljetimdi densaýlyq saqtaý» ulttyq jobasynda, sondaı-aq Qazaqstan Respýblıkasynda ana men bala densaýlyǵyn saqtaý jónindegi tujyrymdamanyń jobasynda kózdelgenin habarlaımyz.
Munyń bári mindetti medısınalyq saqtandyrý júıesinde júıesinde 2030 jylǵa deıin jyl saıyn daıyndalǵan EKU pasıentteriniń barynsha kóp sanyn qamtamasyz etýge múmkindik beredi.
Qazaqstan qosalqy reprodýktıvti tehnologıalardy qoldana otyryp, bedeýlikti emdeýde aldyńǵy qatarda, elde gınekologıa, andrologıa, genetıka, embrıologıa, perınatologıadaǵy sońǵy tehnologıalar qoldanylady.
Alaıda, bedeýlik - bul kóbinese aldyn alýǵa bolatyn jáne osylaısha qymbat emdeýge degen qajettilikti tómendetetin aýrý bolyp tabylady.
Sondyqtan Mınıstrliktiń birinshi kezektegi mindetteri jasóspirimder men jastarǵa profılaktıka jáne jynystyq bilim berý baǵdarlamasyn jetildirý bolyp tabylady. Bul jynystyq jolmen beriletin ınfeksıanyń aldyn alý jáne emdeý, qaýipti aborttardyń aldyn alý, kontrasepsıamen qamtý jáne salamatty ómir saltyn nasıhattaý bolyp tabylady.