Qazaqstandyq kásipqoı boksshy qyz Angelına Lýkas sońǵy birneshe jekpe-jegin Taılandta ótkizgeni belgili. Onyń oqý jattyǵý jıyndary da osy elde ótip jatyr. Endi otandasymyz 12-shi jekpe-jegin bıyl shildede ózge memlekette ótkizetinin málimdedi.
Lýkas Taılandta uzaq ýaqyt turaqtaýynyń sebebin munda kásipqoı boks keshteriniń jıi ótetinimen túsindirip otyr.
«Jekpe-jek kestesiniń tyǵyz bolýyna baılanysty Azıanyń osy buryshynda biraz ýaqyttan beri júrmin. Men qatysyp júrgen boks keshteri aýqymy jaǵynan álemde úshinshi oryn alady. Búginge deıin Taılandta 600-ge jýyq kásipqoı boks keshi ótipti. Bul jerge álemniń túkpir-túkpirinen boksshylar kelip, jekpe-jekterin ótkizip jatady. Men bolsam shildede ótetin kelesi kezdesýimdi basqa memlekette ótkizýdi josparlap otyrmyn. Al, jyl sońyna qaraı múldem basqa qurlyqqa ketemiz. Jańa belesterdi baǵyndyrý úshin, úlken jekpe-jek ótkizý úshin», - dep jazdy ol óziniń Instagram-paraqshasynda.
Eske salaıyq, sońǵy kezdesýinde Anshelına Lýkas ındonezıalyq Harma Iestıdi jeńdi. Bul boks keshi Taıland astanasynda 30 mamyrda ótken bolatyn.