Ispanıadan Qazaqstanǵa anasyn izdep kelgen Jánibek esimdi 21 jastaǵy jas jigit (qazirgi qujatynda Eddı Jan, – red.) shetelge ushyp ketti. Ol jolǵa shyǵar aldynda áleýmettik jelide jazba qaldyrdy.
Qurmetti qazaqstandyqtar! Ózderińizdeı qonaqjaı, meıirimdi halyqpen tanysýǵa múmkindik bergenderińiz úshin jáne qoldaý tanytqandaryńyz úshin myń alǵys! Men Qazaqstannyń ár ulyna, qyzyna, anasyna, ákesine tántimin jáne rızamyn! Dostar, meniń vızamnyń ýaqyty aıaqtaldy. Endi týǵan jerden ketýim kerek. Biraq men jaqyn arada qaıtyp kelemin. Men týǵan anamdy izdeýdi toqtatpaımyn. Keshe Qazaq radıosynyń «Barmysyń, baýyrym?» habarynyń redaksıasyna meniń atymnan sot otyrysyna qatysýǵa, maǵan qatysty kez kelgen málimet alýǵa, meniń atymnan aryz, ótinish, shaǵym jazýǵa zań boıynsha tolyq ruqsat berdim, – dep jazdy ol.
Jánibek Qazaqstanǵa kelgende anasyn izdeýge kómektesken barsha azamatqa alǵys aıtty. Sonymen birge ol ózi úshin qıyn kúnderdiń bolǵanyn da jasyrmady.
Qazaqstanǵa kelgeli qanshalyqty emosıonaldy kúıde bolǵanymdy kórdińizder. Men úshin tym aýyr kúnder boldy. Endi men óz-ózime kelý úshin ózime biraz ýaqyt bólýdi jón kórdim. Sondyqtan Ispanıaǵa birden qaıtpaımyn. Birer kún Taılandta bolamyn. Oıymdy jınaqtap, demalyp alǵym keledi. Ázirge kóp málimetti aıta almaımyn. Biraq bul oqıǵa men kútkennen de qıyn sıaqty...
Qazaq radıosynyń «Barmysyń, baýyrym?» habary arqyly 2002 jylǵy qańtarda Arqalyq qalasynyń perzenthanasyna ulyn tastap, qolhat jazyp ketken, arhıvtik resmı qujattar negizinde meniń týǵan anam bolyp sanalatyn áıel tabyldy. Ol áıelge qazir redaksıa ekinshi ret DNQ saraptamasyn jasap jatyr. @kymbatdoszhan & @asel_asqarqyzy sizder izdeı berińizder! Alda kóp jańalyq bolady dep senemin, – dedi Jánibek.
Ol ár qazaqtyń balasynyń ózine baýyr ekenin túsingenin aıtty.
Qazaqstanym, rahmet saǵan, týǵan el! Eń bastysy, men bul saparymda týǵan jerimdi taptym, týǵan elimmen qaýyshtym, ár qazaqqa bala, baýyr ekenimdi túsindim. Bárińizdi jaqsy kóremin. Amandyqta júzdeseıik! – dedi ol.
Eske sala ketsek, buǵan deıin belgıalyq otbasy asyrap alǵan qazaq balasynyń Qazaqstanǵa kelip, anasyn izdeıtini týraly jýrnalıs Oljas Berkinbaev óziniń Facebook-tegi paraqshasyna jazǵan bolatyn. Odan keıin bul aqparat BAQ-ta tarap, iske búkil el aralasyp ketti.